Տարածքային հարկային տեսչություններում 2014թ. ընթացքում ծրագրված է շահագործման հանձնել հարկատուների սպասարկման 10 նոր սրահներ, որոնց համար նախատեսված է ձեռք բերել 599.000 դրամ արժողության 10 հատ «LED 50» մակնիշի հեռուստացույց: Ըստ ՊԵԿ-ի՝ նշված տեխնիկական հատկանիշներ ունեցող հեռուստացույցի անհրաժեշտությունը թելադրված է սպասարկման սրահների այնպիսի հատկանիշներով, ինչպիսիք են՝ ընդհանուր մակերեսը, լուսավորվածության աստիճանը եւ այլն: Հեռուստացույցները օգտագործվելու են հարկատուներին տեսանյութերի միջոցով տարբեր տեսակի տեղեկատվություն հաղորդելու համար:

Իսկ հարկային տարածքային տեսչությունների մասնաշենքերի առաջին հարկերում տեղադրված պատուհանները եւ դռները մետաղյա վանդակաճաղերով պաշտպանելու համար կծախսեն 36.800.000 դրամ: ՊԵԿ-ից պարզաբանում են, որ ներկայումս վանդակաճաղերով ապահովման ենթակա մակերեսը կազմում է շուրջ 2.000 քմ, իսկ տեղական շուկայում վանդակաճաղերի 1 քմ համար ձեւավորված նվազագույն գինը կազմում է շուրջ 18.400 դրամ:

Զգալի միջոցներ են նախատեսված նաեւ հեռուստահաղորդումների հեռարձակման ծառայությունների համար՝ 28 մլն դրամ, իսկ արբանյակային կապի վարձակալության համար՝ 48 մլն 100 հազար դրամ: Ըստ ՊԵԿ-ի աշխատակազմի ղեկավարի՝ հեռուստատեսությամբ  գովազդվում են հարկային վարչարարության կատարելագործմանն ուղղված  միջոցառումների մասին տեսանյութեր, իսկ արբանյակային կապը ապահովում է լայնաշերտ կապուղի ՊԵԿ-ի մաքսատների (մաքսակետերի) եւ վերադաս մարմնի միջեւ անհրաժեշտ տեսաթվային տեղեկատվության փոխանակման համար:

2014թ. ընթացքում նախատեսված է գնել 29.000 դրամ արժողությամբ 12 հատ գելային գրիչ, 1.100 դրամանոց՝ 80 հատ եւ 37.5 դրամանոց՝ 400 հատ գրիչ: 29.000 դրամանոց գրիչները նախատեսված են արարողակարգային միջոցառումների ընթացքում բարձրաստիճան արտասահմանյան հյուրերին, պաշտոնական պատվիրակությունների անդամներին այլ հուշանվերների եւ տպագիր նյութերի հետ միասին նվիրելու նպատակով, իսկ 1.100 դրամ արժողությամբ գրիչները կոմիտեի ներքին օգտագործման համար են: 

Աղբյուրը՝ hetq.am