2012 թ-ի 9 ամիսների համար  Հայաստանի պետական բյուջեն 6,2 մլրդ դրամ կամ 15,3 մլն. դոլար ավելցուկով է փակվել: Ինչպես այսօր` հոկտեմբերի 30-ին լրագրողներին հայտնել է  ֆինանսների փոխնախարար, Հայաստանի գլխավոր գանձապահ Ատոմ Ջանջուղազյանը, ըստ նախագծի, 9 ամիսների բյուջետի կատարողականը պետք է 57,4 մլրդ դրամի պակասորդ ունենար: Պակասորդի ներքին ֆինանսավորումը կազմել է 20,2 մլրդ դրամ (նախատեսված, սակայն չծախսված), արտաքինը` 14 մլրդ:

Ավելցուկը մեծամասամբ պայմանավորված է  նախատեսվածից` 26 մլրդ դրամից ավելի շատ  վարկային միջոցների ստացման, ինչպես նաեւ բյուջետային ծախսերի համենատաբար ցածր կատարման հետ:

2011 թ-ի 9 ամիսների նկատմամբ 2012 թ-ի 9 ամիսների  ծախսերի ծավալը  աճել է  3,7 տոկոսով` կազմելով 660,2 մլրդ դրամ: Ընթացիկ ծախսերը կազմել են 611,3 մլրդ` պլանային ցուցանիշի 94,7 տոկոսը: