Իրաքի երկաթգծերի տնօրինության ներկայացուցիչների հետ հանդիպմանը քննարկվեցին հաղորդակցության ոլորտում փոխգործակցության հնարավորությունները: Իրաքցի պաշտոնյաները տեղեկություններ ներկայացրին  երկրում երկաթգծի համակարգի վիճակի, զարգացման հեռանկարային ծրագրերի մասին:

Ա. Գեւորգյանն իր հերթին անդրադարձավ Իրան-Հայաստան երկաթգծի կառուցման  ծրագրին` նկատելով, որ այն էապես նոր հնարավորություններ կստեղծի տարածաշրջանում բեռնափոխադրումների առումով:

Պայմանավորվածություն ձեռք բերվեց առաջիկայում մասնագիտական մակարդակով  երկկողմ քննարկումների կազմակերպման վերաբերյալ, որոնց ընթացքում ոլորտում փոխշահավետ գործակցության առաջարկություններ կձեւավորվեն եւ կներկայացվեն կողմերին:

ՀՀ փոխվարչապետի մյուս հանդիպումը Իրաքի նավթի նախարար Աբդ ալ Քարիմ Լուայբիի հետ էր: Կողմերը քննարկեցին էներգետիկայի եւ բնական պաշարների բնագավառում համագործակցության հարցեր: Երկուստեք կարեւորվեց միջկառավարական հանաձնաժողովի նիստի ընթացքում ձեռք բերված` ոլորտում համագործակցության ծրագրի մշակման վերաբերյալ պայմանավորվածությունը: Զրուցակիցները  ընդգծեցին, որ  առկա է գործակցության մեծ ներուժ` թե էներգետիկայի, թե նավթագազային  բնագավառում:

Ա. Գեւորգյանն անդրադարձավ Հայաստանում էներգետիկ ոլորտում իրականացվող ծրագրերին, որոնք հնարավորություն են տալու Հայաստանին` առավել հզորացնել էներգիա մատակարարող երկրի իր կարողությունները:

Աբդ ալ Քարիմ Լուայբին Իրաքում էլեկտրակայանների արդիականացման, դրանց շինարարությունն ավարտին հասցնելու, շահագործման աշխատանքներում օգտակար համարեց հայ մասնագետների հմտությունների օգտագործումը` հաշվի առնելով էներգետիկայի վերականգնման ոլորտում հայկական կողմի փորձը:

Քննարկվեցին նավթագազային արդյունահանման  բնագավառում փոխգործակցության հարցեր, անդրադարձ եղավ նավթագազային արդյունահանման աշխատանքներին հայկական կողմի մասնակցության հնարավորությանը:

Պայմանավորվածություն ձեռք բերվեց, որ առաջիկայում  համապատասխան աշխատանքային խմբերը կուսումնասիրեն  հնարավորությունները` նավթագազային ոլորտում փոխշահավետ ծրագրերի իրականացման նպատակով: Մասնավորապես նշվեց գազի արտադրման եւ կուտակման կարողությունների ստեղծման մասին:

Փոխվարչապետը հանդիպեց նաեւ Իրաքի արտաքին գործերի նախարար Հոշյար Զեբարիի հետ: Քննարկվեցին երկու երկրների միջեւ հարաբերությունների խորացման, արտաքին քաղաքականության ոլորտում համագործակցության հարցեր:

Ա. Գեւորգյանը ողջունեց  Իրաքի  իշխանությունների` երկրի անվտանգության,  կայունության պահպանման ուղղությամբ աշխատանքները եւ վստահություն հայտնեց, որ կայունության ճանապարհը Իրաքի ժողովրդի համար անշրջելի կդառնա: Նա նշեց, որ Հայաստանը շահագրգռված է նաեւ  միջազգային կազմակերպությունների շրջանակում հայ-իրաքյան համագործակցության զարգացման ու քաղաքական երկխոսության ծավալման հարցերում:

Հոշյար Զեբարիին տեղեկացրեց, որ  Իրաքը քաղաքական դիրքորոշում ունի Հայաստանի հետ  խորացնելու թե քաղաքական, թե տնտեսական հարաբերությունները, եւ դրա համար առկա են բոլոր պայմանները: Դրան կնպաստի նաեւ Հայաստանում Իրաքի դեսպանատան բացումը: Նա նաեւ ողջունելի համարեց Հայաստանի ավանդական բարեկամական հարաբերությունները արաբական երկրների հետ, ինչը, նրա խոսքով, լավ հիմք է ամուր փոխգործակցության համար:  Նա նաեւ անդրադարձավ Իրաքի հայ համայնքին` նշելով, որ թեեւ պատերազմական տարիներին շատ իրաքահայեր լքեցին երկիրը, սակայն հիմա Իրաքը պատրաստ է սիրով ետ ընդունել նրանց:

Զրուցակիցները վստահություն հայտնեցին, որ առաջիկա տարիները լայն հեռանկարներ են բացելու երկկողմ հարաբերությունների զարգացման համար:Նրանք մտքեր փոխանակեցին նաեւ տարածաշրջանային խնդիրների շուրջ: