19:45 ԱՄՆ ՄԶԳ-ն կշարունակի ՏԻ ոլորտում աջակցության ծրագրերը | |
ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց ԱՄՆ Միջազգային զարգացման գործակալության (ՄԶԳ) հայաստանյան գրասենյակի ղեկավար Քարեն Հիլիարդին: Հանդիպմանը մասնակցում էր նաեւ Հայաստանում ԱՄՆ արտակարգ եւ լիազոր դեսպան Ջոն Հեֆերնը: Փոխվարչապետը նախ շնորհավորեց տիկին Հիլիարդին` առաքելությունը ստանձնելու կապակցությամբ եւ հույս հայտնեց, որ ԱՄՆ ՄԶԳ-ի հետ ձեւավորված արդյունավետ փոխգործակցությունը կշարունակվի: Նշելով, որ ՄԶԳ -ն ՀՀ կառավարության կարեւոր գործընկերներից է` փոխվարչապետը հատկապես անդրադարձավ տարածքային կառավարման եւ ՏԻ մարմինների աջակցությանն ուղղված համատեղ ծրագրերին` հույս հայտնելով, որ այդ ուղղությունը կշարունակի մնալ ՄԶԳ օրակարգում: Նա տեղեկացրեց, որ տեղական ինքնակառավարման համակարգի ամրապնդման եւ տեղական ժողովրդավարության զարգացման խնդիրներն առաջնային են կառավարության համար: Փոխվարչապետը գոհունակություն հայտնեց ՄԶԳ-ի աջակցությամբ "Քաունթերփարթ ինթերնեշնլ" կազմակերպության կողմից իրականացվող "Քաղաքացիական հասարակության եւ տեղական ինքնակառավարման աջակցության ծրագրի" ընթացքից, ինչպես նաեւ յուրահատուկ համարեց ՄԶԳ ծրագրերը, որոնք գլոբալ խնդիրներին զուգահեռ`նաեւ գործնական հարցերի լուծման բաղադրիչ են ներառում: Քարեն Հիլիարդն իր հերթին արդյունավետ փոխգործակցությունը շարունակելու պատրաստակամություն հայտնեց: Նա նշեց, որ տեղական մակարդակում տնտեսական եւ քաղաքական զարգացմանն ուղղված նախաձեռնություններն առաջիկա հինգ տարիներին ներառված կլինեն ՄԶԳ ծրագրերում: Գրասենյակի ղեկավարը նաեւ տեղեկացրեց, որ բացի "Քաունթերփարթ ինթերնեշնլ" կազմակերպության կողմից իրականացվող ծրագրից, ՄԶԳ-ն պատրաստվում է սկսել համայնքների, հատկապես` հեռավոր համայնքների զարգացմանն ուղղված նոր ծրագիր: Կողմերն անդրադարձան նաեւ վերջին ՏԻՄ ընտրություններին: Փոխվարչապետը նշեց, որ դրանք անցել են կազմակերպված, հանգիստ պայմաններում, գործող օրենսդրությանն ու միջազգային չափորոշիչներին համապատասխան: Այս տարի 697 համայնքում անցկացված ղեկավարի ընտրությունների արդյունքում փոխվել է համայնքապետերի մոտ 20 տոկոսը: ՀՀ ՏԱՐԱԾՔԱՅԻՆ ԿԱՌԱՎԱՐՄԱՆ ՆԱԽԱՐԱՐՈՒԹՅԱՆ Հասարակայնության հետ կապերի բաժին | |
|
Մեկնաբանություններ: 0 | |