Հայաստանի աշխատանքի եւ սոցիալական հարցերի նախարար Ա. Ասատրյանն ընդունել է ԱՄՆ Միջազգային զարգացման գործակալության Եվրոպայի եւ Եվրասիայի բյուրոյի ներկայացուցիչ տիկին Պ. Ալեքսանդրին եւ հայաստանյան առաքելության տնօրեն տիկին Ք. Հիլիարդին:

Նախարարության մամուլի ծառայությունից NEWS.am-ին հայտնում են, որ ողջունելով հյուրերին` նախարարը նշել է. «Ուրախ եմ հանդիպման եւ մեր համագործակցության համար, բարձր եմ գնահատում ԱՄՆ ՄԶԳ-ի հետ մեր գործընկերությունը, որը հնարավորություն է տալիս քննարկել եւ լուծել ոլորտի կարեւորագույն բարեփոխումների ընթացքում առաջացող խնդիրները»: Հյուրերի խնդրանքով նախարարը ներկայացրել է կենսաթոշակային բարեփոխումների, ինտեգրված սոցիալական ծառայությունների համակարգի ներդրման, պետական խնամքի հաստատություններում խնամող երեխաների սոցիալական պաշտպանության, հաստատությունների բեռնաթափման եւ այլընտրանքային ծառայությունների` ցերեկային խնամքի կենտրոնների ցանցի ընդլայնման, հասարակական կազմակերպությունների հետ համագործակցության արդյունավետության բարձրացման եւ այլ ուղղություններով  կատարված աշխատանքների մասին:

Տիկին Ալեքսանդրը նշել է, որ Հայաստանում եղել է 1999-ին եւ տպավորված է երկրի, մասնավորապես` սոցիալական պաշտպանության ոլորտի հաջողություններով եւ հավաստիացրել, որ  պատրաստ է նպաստել ոլորտի բարեփոխումներին ուղղված ծրագրերին: