21:40 Առաջին անգամ համայնքային բյուջեից 20 միլիոն դրամ է հատկացվել Երեւանում թեքահարթակների կառուցման համար | |
Երեւանի քաղաքապետարանի 2013 թվականի շինբարեկարգման ծրագրով համայնքային բյուջեից 20 միլիոն դրամ է հատկացվել քաղաքի փողոցների հետիոտնային անցումների թեքահարթակների կառուցման նպատակով: Քաղաքապետարանի մամուլի ծառայությունից հայտնում են, որ այդ գումարի շրջանակում կկահավորվի շուրջ 100 թեքահարթակ: Բացի այդ, թեքահարթակներ կկառուցվեն մայրաքաղաքի 9 վարչական շրջանների վարչական շենքերի մուտքերի մոտ: Մինչ այդ նմանատիպ աշխատանքներ էին կատարվել ներառական կրթություն իրականացնող բոլոր 45 դպրոցներում: Ընդ որում, չափորոշիչներով նախատեսված է ապահովել թեքահարթակի 8-ից 10 տոկոս թեքություն, որպեսզի հենաշարժողական համակարգի խնդիրներ ունեցող քաղաքացիներն առանց կողմնակի միջամտության կարողանան անցնել այն: Բազմաբնակարան, բազմաֆունկցիոնալ եւ հասարակական տիպի շենքերի նախագծային աշխատանքների համար տրվող ճարտարապետահատակագծային առաջադրանքներում եւս, որպես կանոն, պարտադիր պայման է թեքահարթակի կառուցման անհրաժեշտությունը: Շինարարական օբյեկտների շինաշխատանքների ավարտից հետո հանձնաժողովի կողմից կազմված հանձնման-ընդունման, հետագայում նաեւ փաստագրման ակտերը հաստատվում են միայն թեքահարթակների առկայության դեպքում: Երեւանի քաղաքապետարանի այս ռազմավարության հիմքում հենաշարժողական խնդիրներ ունեցող քաղաքացիների համար քաղաքային միջավայրի ավելի հարմարավետ պայմաններ ստեղծելն է`ապահովելով անխոչընդոտ տեղաշարժի հնարավորություն: | |
|
Մեկնաբանություններ: 0 | |