17:54 Ավիաօդերեւութաբաններ. Պարտքերը չվերադարձնելու դեպքում «Արմավիան» չի թռչի | |
Եթե «Արմավիա» ընկերությունը չվճարի ավիաօդերեւութաբանական տեղեկատվության ծառայությունների դիմաց, այն այլեւս չի տրամադրվի: Այդ մասին այսօր՝ նոյեմբերի 6-ին լրագրողներին հայտնել է «Ավիաօդերեւութաբանական կենտրոն» ՊՓԲԸ-ի տնօրեն Պավել Մանուկյանը: «Արմավիայի» պարտքերի պատճառով «Ավիաօդերեւութաբանական կենտրոնն» ինքն է պարտքեր կուտակել հարկային ծառայությունում: «Արմավիան» նախորդ տարին գերազանցող ռեկորդ է սահմանել: «Մեզ ունեցած նրանց պարտքը նախորդ տարվա 48 մլն դրամի փոխարեն այս տարի կազմել է 93,4 մլն: Ընկերությունը հրաժարվում է մեզ հետ որեւէ շփումից: Մենք էլ մեր հերթին այլ ընկերություններին պարտքեր ունենք, որոնք «Արմավիայի» պարտքերի պատճառով չենք կարողանում վճարել», – ասել է Մանուկյանը: Ինչպես նշել է ընկերության իրավաբանը, հարկային պարտավորությունների պատճառով ընկերությանը կարող է արգելվել օդանավակայանի համալիրի տարածքում տեղակայված ծառայողական շինություններից օգտվել: Ընկերությունը հարկային ծառայությունից արդեն իրազեկում է ստացել, որ եթե կարճ ժամանակում պարտքերը չմարվեն, կենտրոնի նկատմամբ պատժամիջոցներ կկիրառվեն. «Այո, առանց մեզ նրանք կարող են ավիաօդերեւութաբանական այլ տվյալներից օգտվել, բայց մեր ընկերության հետ այդկերպ վարվելու իրավունք չունեն: Ես արդարության հասնելու համար նախագահին կդիմեմ՝ որպես մարտական ընկերոջ եւ գերագույն հրամանատարի», – վստահեցրել է Պավել Մանուկյանը: Նրա խոսքով՝ ավելի վաղ ընկերությունը աչք էր փակում ավիափոխադրողի պարբերական պարտքերի վրա՝ «հայ ուղեւորների շահերից ելնելով»: Միաժամանակ, հավելել է նա, ընկերության ծառայությունները հետխորհրդային տարածքում ամենաորակյալներից եւ էժաններից են: 107 տեղանոց օդանավի թռիչքային-ոչ թռիչքային եղանակի մասին տվյալները 100 դոլարից քիչ արժեն: «Ավիաօդերեւութաբանական կենտրոն» ՊՓԲԸ-ի 100%-անոց բաժնետերը Հայաստանի բնապահպանության նախարարությունն է: | |
|
Մեկնաբանություններ: 0 | |