Ռուսաստանի մայրաքաղաքում բացահայտվել է խարդախների խումբ, որը ստեղծել էր փողերի անօրինական կանխիկացման մեջ մասնագիտացած ընդհատակյա բանկերի մի ամբողջ ցանց: Անօրինական բիզնեսի կազմակերպիչ Ջեյխուն Ահմեդովի նկատմամբ հայտարարված է դաշնային հետախուզում: Այդ մասին հայտնում է Վեստի FM ռադիոկայանը:

 Մոսկվայի ոստիկանության տնտեսական անվտանգության և կաշառակերության դեմ պայքարի վարչության աշխատակիցների տեսադաշտում խարդախները հայտնվել էին 2012-ի տարեսկզբին: Իրավապահները ստացել էին տեղեկատվություն առ այն, որ միրգ-բանջարեղենի բազաներից մեկի տարածքում ընդհատակյա բանկեր են գործում, որոնց օրական շրջանառությունը տասնյակ միլիոն ռուբլի է: Հարուցվել էր քրեական գործ ՌԴ Քրեական օրենսգրքի 172 հոդվածի` անօրինական բանկային գործունեություն, հատկանիշներով: