«Քննարկմանը ներկա են եղել հիմնականում ԱԺ կրթության եւ գիտության, մշակույթի եւ երիտասարդության հարցերի հանձնաժողովի անդամները։ «ՉԻ» հարցին, թե ի վերջո, ի՞նչ խնդիր է լուծվում այս օրինագծի ընդունումով, հիմնական զեկուցող, ԿԳ նախարար Արմեն Աշոտյանը նշեց. «Կրթության միասնական քաղաքականություն՝ ողջ կրթական համակարգում եւ կրթության նոր ստանդարտների ավելի բարձր նշաձողերի հաղթահարում»։

Նշենք, որ ՀՀ կառավարությունը որոշել է այս օրենքի կիրարկմամբ բոլոր կրթական բուհերում միասնական կրթական քաղաքականություն իրականացնել։ Նոր օրենքով, կրթական համակարգի մաս կդառնան նաեւ բժշկական բարձրագույն ուսումնական հաստատությունները, որոնք մինչեւ օրս դուրս էին մնացել համակարգից։ Սա նշանակում է, որ բժիշկներ պատրաստող մասնավոր բուհերում էլ  կներդրվի ընդունելության այն կարգը, որը գործում է պետականների դեպքում։

Օրենքի ընդդիմախոսները պնդում են, որ այս կերպ փորձում են «չեզոքացնել» մասնավոր բուհերը, եւ կառավարությունը դեմ է գնում մասնավոր սեփականության սկզբունքին»,- գրում է «Չորրորդ ինքնիշխանությունը»։