Հայաստանի ֆինանսական շուկայում ամերիկյան դոլարը շարունակում է ամրապնդվել, սակայն նախորդ օրերի համեմատ` ավելի նվազ տեմպով: «ՆԱՍԴԱՔՕԷՄԷՔՍ Արմենիա» բորսայում այսօր՝ հոկտեմբերի 2-ին դոլարի միջին փոխարժեքը հայկական դրամի նկատմամբ կազմել է 408.75 դրամ: Նախորդ օրվա համեմատ դոլարը հայկական դրամի նկատմամբ աճել է 0.06 %-ով կամ 0.16 կետով:

Բորսայում այսօր ընդհանուր առմամբ վաճառվել է 3.68 մլն. դոլար:

Կանխիկ արտարժույթի շուկայում դոլարի առքի ու վաճառքի փոխարժեքը գտնվում է 406-410 դրամի միջակայքում:

Forex միջազգային շուկայում դոլարն օրվա առաջին կեսին թուլացման նշաններ էր ցույց տալիս, այն մտահոգությունների հիման վրա, որ ԱՄՆ Ֆեդերալ ռեզերվային համակարգը կվերսկսի քանակական խթանման քաղաքականությունը` արժեզրկելով դոլարը: Սակայն օրվա երկրորդ կեսին դոլարը վերակագնեց իր դիրքերը` 1 եվրոն արժե 1.2938 դոլար:

Ռուսաստանի միջբանկային արժութային շուկայում նույնպես դոլարը թուլացել է. 1դոլարն արժե 31.1350 ռուբլի: