«ՆԱՍԴԱՔՕԷՄԷՔՍ Արմենիա» բորսայում այսօր՝ հոկտեմբերի 29-ին ամերիկյան դոլարի միջին փոխարժեքը հայկական դրամի նկատմամբ կազմել է 405.75 դրամ: Նախորդ առեւտրային նստաշրջանի համեմատ (հոկտեմբերի 25) դոլարը թանկացել է 0.15%-ով կամ 0.62 կետով: Նշենք սակայն, որ այսօր սպասվում էր դոլարի թանկացման ավելի բարձր տեմպ, հաշվի առնելով, որ ուրբաթօրյա նստաշրջանում դոլարի առաջարկ չի եղել նույնիսկ 1դոլար/406 դրամ փոխարժեքի պարագայում: Սակայն այսօր դոլարի առաջարկը բավական մեծ էր` 5.7 մլն դոլար:

Նշենք, որ դոլարի ամրապնդմանը նպաստել է նաեւ ՀՀ կենտրոնական բանկը` նախորդ շաբաթ բորսայում գնելով 1.6 մլն դոլար: Ամենայն հավանականությամբ` ֆինանսական շուկայում շաբաթվա վերջի անորոշությունները պայմանավորված էին սպասումներով, թե արդյո՞ք ԿԲ-ն կշարունակի միջամտել փոխարժեքին:

Կանխիկ արտարժույթի շուկայում այսօր դոլարը հիմնականում կայունացել է 405-407 դրամ միջակայքում:

Forex միջազգային շուկայում եվրոն թուլանում է դոլարի նկատմամբ` Իսպանիայի մակրոտնտեսական վիճակագրական տվյալների անբարենպաստ ֆոնի ներքո: Մեկ եվրոյի փոխարժեքը գտնվում է 1.29 դոլարի մակարդակին մոտ:

Ռուսաստանի միջբանկային արժութային շուկայում եւս դոլարը ամրապնդվել է ռուբլու նկատմամբ. 1դոլարն արժե 31.4732 ռուբլի: