Բանախոսներ

ՀՀ էկոնոմիկայի նախարարության արդյունաբերության քաղաքականության վարչության պետ Հայկ Միրզոյան

ՀՀ Վայոց Ձորի մարզպետ Էդգար Ղազարյան

Հայաստանի համայնքների միության նախագահ Էմին Երիցյան

"Արենի փառատոն” հիմնադրամի նախագահ Նունե Մանուկյան

Հայաստանը հայտնի է որպես գինեգործության հնագույն կենտրոն և, ըստ մասնագետների, դրա վկայությունն է Հայաստանի տարածքում խաղողի 500 տեղական սորտերի առկայությունը: Գինու արդյունաբերական արտադրությունը Հայաստանում սկսվել է 1870-ական թվականներին: Խորհրդային իշխանության տարիներին գինեգործությունը Հայաստանում մեծ զարգացում ապրեց: Խորհրդային Միության փլուզումից հետո հայկական գինու արտադրությունը ժամանակավոր անկում ապրեց, սակայն վերջին տարիներին Հայաստանի գինու արտադրողները սկսեցին վերականգնել խաղողի այգիները և հիմնադրեցին նոր գործարաններ: Տնտեսության զարգացումը նոր շունչ տվեց Հայաստանի գինու արդյունաբերական արտադրությանը:

ՀՀ կառավարությունն այսօր ակտիվ քաղաքականություն է վարում Հայաստանում գինեգործության զարգացման ուղղությամբ:

• Նախորդ տարվա դեկտեմբերին կառավարության կողմից ընդունված «Հայաստանի Հանրապետության արտահանմանն ուղղված արդյունաբերական քաղաքականության ռազմավարությամբ» գերակա ոլորտների շարքում է նաև գինեգործության ոլորտը` որպես արտահանման ներուժ ունեցող ճյուղ:

• ՀՀ էկոնոմիկայի նախարարության կողմից, Գերմանիայի միջազգային համագործակցության ընկերության աջակցությամբ, մշակվել և ներկայումս շահագրգիռ կողմերի հետ քննարկման փուլում է գտնվում Գինեգործության ոլորտային ռազմավարությունն ու դրա իրականացումն ապահովող գործողությունների ծրագիրը:

Գինեգործության զարգացման ռազմավարությունն ուղղված է 2 հիմնախնդիրների լուծմանը. այն է` բարձրորակ և միջազգայնորեն մրցունակ արտադրանքի արտադրության աճ և վաճառքների ավելացում` ի հաշիվ առկա շուկաների ընդլայնման և նոր շուկաներ մուտքի ու գինու ներքին սպառման ծավալների աճի:

Գինեգործության զարգացման ռազմավարության իրականացումն ապահովող գործողությունների ծրագրում նախանշված են այն հիմնական միջոցառումները, որոնց իրականացումը թույլ կտա հաղթահարել ոլորտի զարգացմանը խոչընդոտող հիմնախնդիրները և իրականացնել ռազմավարությամբ սահմանված նպատակները: Նշված միջոցառումները դասակարգված են ըստ հետևյալ ուղղությունների`

• ոլորտին որակյալ և համապատասխան քանակությամբ խաղողի հումքով ապահովում,

• որակի վերահսկման համակարգի ամբողջականացում և համապատասխանեցում միջազգային չափանիշներին,

• գինեգործական արտադրությունների վերազինում,

• ժամանակակից հմտություններով մասնագետների առկայություն:

Համաձայն գինեգործության ոլորտային ռազմավարության` նախատեսվում է մինչև 2020 թվականը ներքին սպառման և արտահանման ծավալների աճի հաշվին աստիճանաբար եռապատկել գինու արտադրության և արտահանման ծավալները՝ 2011թ.-ին արտադրված 5.6 մլն լ-ի փոխարեն: 2012թ. առաջին կիսամյակի դրությամբ գինեգործության ոլորտում արտադրվել է մոտ 1.67 մլրդ ՀՀ դրամի արտադրանք` նախորդ տարվա նույն ժամանակահատվածի նկատմամբ աճի տեմպ արձանագրելով 111.7% չափով:

Վերջին տարիների ընթացքում կատարվում են խոշոր ներդրումներ` հատկապես նոր, առաջատար տեխնոլոգիաների ձեռքբերման և արտադրական գործընթացների կատարելագործման ուղղությամբ, մասնավորապես` ՀՀ կառավարության կողմից հավանության արժանացած ներդրումային ծրագրերի շրջանակներում նախատեսվում է գինու արտադրության (ներառյալ` փրփրուն գինու արտադրությունը) ոլորտում իրականացնել մոտ 8մլրդ ՀՀ դրամի ներդրում: Ներդրումներ են կատարվել նաև խաղողի այգիների տնկման ուղղությամբ:

Հայաստանը, լինելով խաղողագործության օրրան և ունենալով գինեգործության 6000 տարվա պատմություն, այսօր էլ թե ներքին և թե արտաքին շուկաներում հայկական գինու լուսաբանման և առաջմղման կարիք ունի: Այսօր այս բացը լրացվում է նաև Հայաստանում կազմակերպվող արդեն ավանդույթ դարձած ամենամյա փառատոնների շնորհիվ, մասնավորապես`«Արենի գինու փառատոնի»: Վերջիններս ուղեկցվում են գինու համտես-մրցույթների կազմակերպմամբ և հնարավորություն են ընձեռում առկա գործարար կապերի զարգացման ու ամրապնդման համար` միավորելով գինեգործության և խաղողագործության ճյուղում ներգրավված գործարարներին, այս բնագավառներում գործող արտերկրի լավագույն մասնագետներին` շարունակելով Հայկական գինու արտադրության դարերի ավանդույթն ու մշակույթը:

Այս նպատակի իրականացմանն է ուղղված նաև Գինեգործության զարգացման գործողությունների ծրագրով նախատեսված «Հայկական գինիներ» հովանոցային բրենդի հայեցակարգի ստեղծումը, որի հիմնական նպատակն է համալիր գործողությունների միջոցով առաջ մղել հայկական գինին միջազգային շուկաներում՝ միաժամանակ ապահովելով արտահանվող գինու որակը:

Արենի գինու փառատոն 2012

«Արենի» Փառատոն» հիմնադրամը ՀՀ կառավարության 2011թ-ի դեկտեմբերի 22-ի N1857-Ն որոշմամբ հաստատված «Զբոսաշրջության աջակցության ծառայություններ» 2012թ. ծրագրի շրջանակներում, ՀՀ Էկնոմիկայի նախարարության, ՀՀ Վայոց Ձորի մարզպետարանի աջակցությամբ, Արենի համայնքի, «Հայաստանի համայնքների միության» և այլ գործընկերների հետ համագործակցությամբ հոկտեմբերի 6-ին կազմակերպում է ավանդական դարձած Արենի գինու փառատոնը:

Փառատոնի կազմակերպման նպատակն է` խթանել գյուղական տուրիզմի զարգացումը, ներկայացնել երկրի հարուստ պատմությունը, մշակույթը, ազգային առանձնահատկությունները, նպաստել Արենի համայնքում և տարածաշրջանում զբոսաշրջության զարգացմանը: Փառատոնը նաև միտված է ներկայացնելու Հայաստանը միջազգային և ներքին զբոսաշրջության շուկայում` որպես գրավիչ զբոսավայր, ինչպես նաև միջազգային գինեգործության շուկայում` որպես գինեգործության օրրան և գինեգործության մշակույթի կարևորագույն վայր:

Փառատոնն առաջին անգամ կազմակերպվել է 2009թ.-ին: Անցած երեք տարիների ընթացքում այն ձեռք է բերել մեծ մասսայականություն և հետաքրքրություն է առաջացրել ոչ միայն Հայաստանում, այլ նաև արտերկրում. Վրաստանում, Ռուսաստանում, Եվրոպայում:

2011թ.-ին Գինու փառատոնի մասնակիցների թիվը կազմել է շուրջ 6000 հոգի: Միջոցառումը լուսաբանվել է ինչպես հայաստանյան, այնպես էլ արտասահմանյան հեռուստաալիքներով, տպագիր և առցանց լրատվաամիջոցներով (Журнал Ереван, OРТ, CNN, YouTube, Facebook և այլն ):

2012թ.-ին Գինու փառատոնին կմասնակցեն Իտալիայի սոմելիեների, հյուրանոցների և ռեստորանների ֆեդերացիայի (FISAR) անդամ, 2011թ.-ին ֆեդերացիայի կողմից լավագույն սոմելիե ճանաչված Լուկա Կանապիկին, ինչպես նաև Ֆրանսիայում, 2008թ.-ին "Gault Millau" պարբերականի կողմից տարվա լավագույն սոմելիե ճանաչված, 2011թ.-ին Արենի գինու փառատոնի ժյուրիի պատվավոր անդամ Սերժ Ղուկասյանը:

Փառատոնի ընթացքում նախատեսվում են մի շարք հետաքրքիր միջոցառումներ: Փառատոնի ծրագիրն ընդգրկում է.

• Բացման հանդիսավոր արարողություն

• Գինեգործական ընկերությունների տոնական շքերթ

• Գործարանային և տնային արտադրության գինիների ցուցահանդես-վաճառք

• Գործարանային և տնային արտադրության պանիրների ցուցահանդես-վաճառք

• Գորգերի ցուցահանդես

• Ազգային երաժշտություն, պար, խաղեր, թատերական բեմադրություններ

• Փակման հանդիսավոր արարողություն Մրցույթներ.

• «Հայաստանը ձեր աչքերով» լավագույն գինու պիտակի մրցույթ (գծանկար)

• Արտադրողների շրջանում «Ոսկե տակառիկ 2012» լավագույն գինու մրցույթ

• Տնական գինի արտադրողների մրցույթ

Միջոցառմանը հրավիրված են ՀՀ կառավարության անդամներ, Ազգային ժողովի պատգամավորներ, միջազգային և հասարակական կազմակերպությունների, զբոսաշրջության ոլորտի ներկայացուցիչներ:

ՀՀ Էկոնոմիկայի նախարարություն

Մամլո հաղորդագրություն