Հուլիսի 19-ին, Լոս Անջելեսում Հայաստանի նստավայրում տեղի է ունեցել Հայ-մեքսիկական աշխատանքային խմբի հերթական հանդիպումը, որին մասնակցել են հայ և մեքսիկացի գործարարներ, Լոս Անջելեսի մարզի պաշտոնյաներ, ամերիկահայ համայնքի ներկայացուցիչներ:

2009 թվականին ստեղծված աշխատանքային խմբի նպատակն է խթանել Կալիֆորնիայի հայկական և մեքսիական համայնքների միջև առևտուրը, ներգրավվել միմյանց շուկաներում և մշակել փոխշահավետ բիզնեսի ծրագրեր: Հայկական կողմի համար համատեղ ծրագրերի իրագործումը նշանակալից է հատկապես Կալիֆորնիայի ամենաազդեցիկ` մեքսիկական համայնքի հետ սերտ կապեր ստեղծելու տեսակետից, քանի որ ԱՄՆ խոշորագույն տնտեսությունն ունեցող նահանգում մեքսիկական համայնքն ունի տնտեսական և քաղաքական գերիշխող դիրք:

Հայ-մեքսիկական աշխատանքային խմբի հերթական հանդիպման ժամանակ Լոս Անջելեսում ՀՀ գլխավոր հյուպատոս Գրիգոր Հովհաննիսյանը հայտարարեց Հայ-լատինական գործարար խորհուրդ ստեղծելու նախաձեռնության մասին: Այն կղեկավարեն երկու կողմը ներկայացնող փորձառու գործարարներ Վահե Կարապետյանը և Միգել Գոնսալեսը: Նրանք կհամակարգեն հայ և մեքսիկացի բիզնեսմենների հետագա շփումը` համատեղ գործարար-ծրագրեր մշակելու նպատակով:

Հայ-մեքսիկական գործարար հանդիպման ավարտին երկու համայնքների մի քանի տասնյակ ներկայացուցիչները ինտերակտիվ հարց ու պատասխանի շնորհիվ հնարավորություն ունեցան անմիջական մթնոլորտում ծանոթանալ պոտենցյալ գործընկերների հետ: Հայկական կողմը կազմակերպել էր նաև հայկական կոնյակի, քաղցրավենիքի և պահածոների համտես: