«Հայաստանում չրերի արտադրության ոլորտում իրացումը եւ արտահանումն ավելացնելու մեծ ներուժ կա, եթե արտադրողները հետեւեն բերքահավաքից հետո պտուղ-բանջարեղենի չորացման կանոններին եւ պահպանեն որակի միջազգային չափանիշները: «Մեր կողմից նշեմ, որ ՓՄՁ ԶԱԿ-ը եւ մեր տեղական ու միջազգային գործընկերները պատրաստ են օժանդակելու հայաստանյան չիր արտադրողներին, որպեսզի նպաստեն այդ ենթաոլորտի առաջխաղացմանը եւ առաջիկա տարիներին արտահանման ծավալների աճին»,- բացման իր խոսքում նշել է ՓՄՁ ԶԱԿ-ի գործադիր տնօրեն Վարազդատ Կարապետյանը:

Միջոցառումից առաջ՝ մարտի 12-ից մինչեւ ապրիլի 18-ը, «Ի-Դի-Էմ-Սի»-ն եւ ՓՄՁ ԶԱԿ-ը համատեղ աշխատել են չրերի արտադրության ոլորտում առկա մի շարք խնդիրների ուղղությամբ: ՓՄՁ ԶԱԿ-ի մասնագետների հետ՝ «Ի-Դի-Էմ-Սի»-ի միջազգային փորձագետ Ռուջերո Մալոսին, ով սննդի եւ ըմպելիքի արտադրության, մշակման, փաթեթավորման ոլորտում գրեթե 25 տարվա փորձ ունի, համագործակցել է տեղական  արտադրողների հետ` որակի միջազգային ստանդարտներ ներդնելու համար անհրաժեշտ չափանիշների ապահովման ուղղությամբ, ինչպես նաեւ վերապատրաստեց չրերի արտադրության 17 մասնագետների՝ որպես դասընթացավարների: Փորձագետը նաեւ մշակել է տեխնոլոգիական մոդելներ, արտադրանքը շուկա հանելու պայմանների ու ստանդարտների գործնական առաջարկությունների փաթեթ, չրերի արտադրության ձեռնարկ եւ ներկայացրեց իր առաջարկները չրագործական գիտելիքների կենտրոն հիմնելու վերաբերյալ:

Միջոցառման ավարտին «Դասընթացավարների վերապատրաստման» դասընթացի մասնակիցներին շնորհվել են վկայագրեր, ովքեր գալիք ամիսներին իրենց ձեռք բերած գիտելիքը կփոխանցեն ավելի մեծ թվով չիր արտադրողների: Վերապատրաստմանը մասնակցած չրագործներն այժմ կկարողանան դիմել ՓՄՁ ԶԱԿ` մինչեւ 5 միլիոն դրամ,  տարեկան 10 տոկոս տոկոսադրույքով ՓՄՁ վարկեր ստանալու համար: