16:08 Հայաստանի փոխվարչապետն ու ՌԴ տարածքային զարգացման նախարարը փոխգործակցության խորացման հարցեր քննարկեցին | |
 Հայաստանի փոխվարչապետ, տարածքային կառավարման նախարար Արմեն Գեւորգյանն այսօր Մոսկվայում հանդիպեց ՌԴ տարածքային զարգացման նախարար Իգոր Սլյունյաեւի հետ: Փոխվարչապետը նախ շնորհավորեց գործընկերոջը` պաշտոնի ստանձնման կապակցությամբ եւ հաջողություններ մաղթեց հետագա գործունեության մեջ: Կողմերը քննարկեցին ինչպես ապակենտրոնացված մակարդակով, այնպես էլ նախարարությունների միջեւ փոխգործակցության հարցեր:ՏԿՆ հասարակայնության հետ կապերի բաժնից հայտնում են, թե երկուստեք արձանագրվեց, որ վերջին տարիներին գործնական քայլեր են իրականացվում հարաբերությունների խորացման ուղղությամբ: Մասնավորապես անդրադարձ եղավ հայ-ռուսական միջտարածաշրջանային համաժողովների անցկացմանը: Զրուցակիցները դրական գնահատեցին 2011 եւ 2012 թվականներին կազմակերպված առաջին եւ երկրորդ համաժողովների արդյունքները: Արձանագրվեց, որ համաժողովները նոր թափ են հաղորդում երկու երկրների միջտարածաշրջանային համագործակցության զարգացմանը եւ դրանց պարբերական անցկացումն առավել համակարգված եւ արդյունավետ կդարձնի ապակենտրոնացված մակարդակով գործակցությունը: Քննարկվեցին նաեւ երրորդ համաժողովի անցկացման հետ կապված հարցեր: Կարեւորվեց համաժողովի շրջանակում գործընկեր տարածաշրջանների միջեւ գործնական շփումների, տարաբնույթ միջոցառումների կազմակերպումը: Հանդիպմանը պայմանավորվածություն ձեռք բերվեց, որ հայ-ռուսական տնտեսական համագործակցության միջկառավարական հանձնաժողովի շրջանակում գործող միջտարածաշրջանային համագործակցության հարցերը համակարգող աշխատանքային խումբը կքննարկի եւ կհստակեցնի համաժողովի օրակարգին եւ ձեւաչափին վերաբերող հարցերը: Զրուցակիցները խոսեցին նաեւ երկու երկրներում տարածքային զարգացման ոլորտում իրականացվող բարեփոխումների մասին: Կարեւորվեց նախարարությունների միջեւ փորձի փոխանակման, փոխայցելությունների անհրաժեշտությունը: Անդրադարձ եղավ նաեւ ԱՊՀ միջռեգիոնալ եւ մերձսահմանային համագործակցության հարցերով խորհրդի գործունեությանը, քննարկվեցին խորհրդի աշխատանքների առավել արդյունավետ կազմակերպման հարցեր: Փոխվարչապետը ներկայացրեց նաեւ ԱՊՀ միջռեգիոնալ եւ մերձսահմանային համագործակցության հայեցակարգի վերաբերյալ հայկական կողմի նկատառումները, ըստ որոնց առաջարկվում է շեշտը դնել միջռեգիոնալ համագործակցության վրա: | |
|
| |
| Մեկնաբանություններ: 0 | |
