14:24 Հայաստանից ոչխարների արտահանումը կրկնակի նվազել է | |
Հայաստանից 2012 թ. արտահանվել է մոտ 61 հազ. գլուխ ոչխար, նախորդ տարվա 115 հազ.-ի համեմատ: Այդ մասին տեղեկացնում է ՀՀ կառավարությանն առընթեր պետեկամուտների կոմիտեն: Մեկ ոչխարը 2012 թ. արտահանվել է 140 դոլար մաքսային արժեքով, այնինչ 2011 թ. արտահանվող ոչխարների մաքսային արժեքը 105 դոլար էր: Այսպիսով՝ արտահանվող ոչխարների ընդհանուր մաքսային արժեքը 2012 թ. կազմել է 8,5 մլն դոլար, 2011 թ. 12 մլն դոլարի համեմատ; Ոչխարները հիմնականում արտահանվել են Իրան, թեեւ իրանական ազգային արժույթի՝ ռիալի գրեթե 4-անգամյա արժեզրկման պատճառով իրանցի գործարարները խուսափում են ոչխարներ ներկրել: Ավելին՝ 2012 թ. առաջին ամիսներին ոչխարի արտահանումը Իրան համարյա դադարել էր, ու միայն վերջին եռամսյակում այն նորից թափ հավաքեց: Հայաստանից ոչխար արտահանվում է նաեւ Արաբական Միացյալ Էմիթություններ, սակայն ոչ մեծ քանակներով: Ոչխարների արտահանման անկման պատճառով ոչխարի մսի գինը երեւանյան շուկաներում կայունացել է՝ կգ-ը մինչեւ 2000 դրամ, նախորդ տարիների 4000 դրամի համեմատ: Նշենք, որ ոչխարների զանգվածային արտահանումն Իրան սկսել է 2009 թ. եւ հասել տարեկան մոտ 140 հազարի; Սկզբնական շրջանում մտավախություն կար, որ զանգվածային արտահանման պատճառով ոչխարների գլխաքանակը Հայաստանում կտրուկ կնվազի, սակայն նման բան տեղի չունեցավ՝ ոչխարների գլխաքանակը, ըստ պաշտոնական տվյալների, վերջին տարիներին կայուն գերազանցում է 500 հազարը, իսկ 2012 թ. նույնիսկ մոտեցել է 600 հազարին: | |
|
Մեկնաբանություններ: 0 | |