16:53 Հայաստանում կբացվի դեղերի եւ սննդի փորձաքննության գերժամանկակից լաբորատորիա | |
ՀՀ Կոտայքի մարզի Նոր Գյուղ համայնքում մինչեւ տարեւերջ կբացվի «Տոնուս-Լես» ընկերության դեղերի եւ սննդի փորձաքննության գերժամանակակից լաբորատորիա: Վայրը ընտրվել է՝ հաշվի առնելով եւ բնապահպանական նորմերը, եւ Երեւանին մոտիկությունը: Լաբորատորիան եզակի է Հայաստանում, քանի որ զինված է գերմանական, շվեյցարական, իսրայելական ժամանակակից գերզգայուն սարքավորումներով, որոնք համապատասխանում են GLP (Good Laboratory Practice) ստանդարտներին: Բացի այդ՝ սա միակ լաբորատորիան է Հայաստանում, որտեղ կենտրոնացված են սննդի, դեղերի, ծխախոտի փորձաքննության (նաեւ՝ դեղերի կենսահամարժեքության փորձաքննության) գործառույթներ: Ըստ «Տոնուս-Լես» ընկերության նախագահ Լեւոն Հակոբյանի՝ ներկայում աշխատանքներ են տարվում ISO 17 025 հավաստագիր ստանալու համար, իսկ դա նշանակում է, որ միջազգային արբիտրաժներում հայկական լաբորատորիայի փորձաքննության արդյունքները ճանաչելի կլինեն: Լաբորատորիայի նշանակությունը մեծանում է նաեւ այն պատճառով, որ 2013 թ. Հայաստանի դեղագործական ոլորտն անցնելու է GNP ստանդարտներին, ինչը ենթադրում է դեղերի որակլալ փորձաքննություն: Լաբորատորիան կառուցվել է ՀՀ կառավարության աջակցությամբ՝ 2010 թ. «Տոնուս-Լես» ընկերությունը ավելացված արժեքի հարկի վճարման տարկետում է ստացել 3 տարով՝ ներկրելով մոտ 470 մլն դրամի սարքավորումներ: Ներդրումաին ծրագրի ընդհաուր արժեքը կազմում է 1,3 մլրդ դրամ: Պատահական չէ, որ ՀՀ վարչապետ Տիգրան Սարգսյանը՝ էկոնոմիկայի եւ առողջապահության նախարարների ուղեկցությամբ այսօր այցելեց այդ լաբորատորիան: Նշենք, որ Հայաստանում ներկայում գործում են 94 հավաստագրված լաբորատորիաներ, որոնցից 23-ը սննդի, 20-ը՝ խմիչքների: Սակայն դրանց մեծ մասը փորձաքննության պատշաճ պայմաններ չի ապահովում: | |
|
Մեկնաբանություններ: 0 | |