13:01 Հայաստանը բարգավաճությամբ աշխարհում 98-րդն է | |
Լոնդոնում տեղակայված «Լեգատում» վերլուծական հաստատության պատրաստած զեկույցները փոխանցվում են որեւէ երկրում մասնաճյուղ բացելու մտադրություն ունեցող ընկերություններին, ինչպես նաեւ միջազգային հետազոտական հաստատություններին։ «Ազատություն» ռադիոկայանի փոխանցմամբ, այս տարվա զեկույցում ընդգրկված է 142 պետություն, որտեղ ապրում է մոլորակի բնակչության 96 տոկոսը եւ արտադրվում է աշխարհի համախառն արդյունքի 99 տոկոսը։ «Լեգատում»-ի վերլուծաբանները ցուցիչը կազմելիս հաշվի են առնում 8 գործոն` տնտեսություն, գործարարություն, կառավարում, կրթություն, առողջապահություն, անվտանգություն, անձնական ազատություն եւ սոցիալական կապիտալ։ Զեկույցում պետությունները դասվել են չորս կարգի` բարգավաճության բարձր, միջինից բարձր, միջինից ցածր եւ ցածր աստիճան։ Հայաստանը այդ ցուցիչով միջինից ցածր կարգում է եւ 142 պետությունների ընդհանուր ցանկում գրավել է 98-րդ տեղը։ Հայաստանի տնտեսությունն աշխարհում 129-րդն է։ Սա նշանակում է, որ 128 երկներում ավելի արդյունավետ մակրոտնտեսական քաղաքականություն է, զարգացում եւ ֆինանսական սեկտորի արդյունավետություն։ Գործարարության ենթացուցիչը «Լեգատում»-ը կազմում է` հիմք առնելով գործարարի համար ստեղծված պայմանները, նրան տրվող հնարավորությունները։ Այս հարցում Հայաստանը 81-րդ երկիրն է։ Կառավարումը ենթադրում է պատասխանատու կառավարություն, արդար ընտրություններ, քաղաքական մասնակցություն եւ օրենքի գերակայություն։ Այդ ենթացուցիչով Հայաստանն աշխարհում 97-րդն է։ Առողջապահությամբ Հայաստանը 98-րդն է, մինչդեռ կրթությամբ, որը հաշվի է առնում կրթության մատչելիությունը, որակը եւ մարդկային կապիտալը, բավական բարձր` 44-րդ տեղում է։ Համեմատաբար բարվոք է համարվել նաեւ անվտանգությունը, որը որոշվում է պետության եւ անձի անվտանգությամբ. այդ ենթացուցիչով Հայաստանը 61-րդն է։ Ամենավատ ցուցանիշները վերաբերում են անձնական ազատությանը եւ սոցիալական կապիտալին. այդ բնագավառներում երկիրը գրավել է 122-րդ եւ 124-րդ տեղերը։ Անձնական ազատության ցուցիչը որոշվում է երկու հանգամանքով` անձի ազատություն եւ հանրային հանդուրժողականություն։ Սոցիալական կապիտալը վերաբերում է բնակչության ակտիվությանը, ներգրավվածությանը բարեգործությանը, ընտանիքների մասնակցությանը համայնքային կյանքին։ Հայաստանի հարեւաններ Ադրբեջանը եւ Վրաստանը փոքր-ինչ ավելի լավ վիճակում են եւ զբաղեցնում են, համապատասխանաբար, 94-րդ եւ 95-րդ տեղերը, Թուրքիան 89-րդն է, Իրանը` 102-րդը։ Բարգավաճության աստիճանով ամենավատ վիճակում են Աֆղանստանը, Կոնգոն եւ Կենտրոնական Աֆրիկյան Հանրապետությունը։ Դե իսկ ամենաբարգավաճ երկրների առաջին եռյակում են Նորվեգիան, Դանիա եւ Շվեդիան։ | |
|
Մեկնաբանություններ: 0 | |