15:54 ՀՀ կենտրոնական բանկը դադարեցրել է «Կոնտակտ» եւ «Բլիզկո» վճարահաշվարկային համակարգերի գործունեությունը Հայաստանում | |
Հայաստանի կենտրոնական բանկն այսօր` դեկտեմբերի 26-ին ուժը կորցրած է ճանաչել 2 վճարահաշվային համակարգերին մասնակցության տրված թույլտվությունները` «Կոնտակտ» եւ «Բլիզկո»: Ըստ ՀՀ ԿԲ հաղորդագրության` նշված համակարգերը վտանգել են Հայաստանի ֆինանսական համակարգի կայունությունը եւ իրացվելիությունը: Մասնավորապես` «Կոնտակտ» վճարահաշվարկային համակարգի օպերատոր հանդիսացող ЗАО АКБ «Русславбанк»-ը անհիմն եւ առանց որեւէ պատճառաբանության, խախտելով հայաստանյան մի շարք առեւտրային բանկերի հետ կնքված պայմանագրերը, չի ապահովել (դադարեցրել է) բանկերում իր համակարգից օգտվելու՝ բանկերի իրավունքը: «Բլիզկոյի» հետ կապված ԿԲ պատճառաբանությունն ավելի սուղ է: Նշված է ընդամենը, որ այն խախտել է ԿԲ ուղեցույցներից մեկը` «Արտաuահմանյան վճարահաշվարկային համակարգում մաuնակցության հետեւանքով Հայաստանի Հանրապետության ֆինանuական համակարգի կայունությունը եւ (կամ) իրացվելիությունը եւ (կամ) վճարունակությունը վտանգելու մաuին»: Նշենք, որ «Կոնտակտը» առանց հաշիվ բացելու ֆիզիկական անձանց համար փոխանցումներ է իրականացնում ողջ աշխարհում: Ընդ որում (ըստ ընկերության պաշտոնական կայքէջի) որոշ երկրներում փոխանցումներն իրականացվում են անհասցե: Այդ երկրների թվում նշված են Հայաստանը, մի շարք նախկին ԽՍՀՄ հանրապետություններ, ինչպես նաեւ Աբխազիան եւ Հարավային Օսեթիան: Լեռնային Ղարաբաղի մասին նշում չկա, ինչը կարող է հանդիսանալ ՀՀ կենտրոնական բանկի կողմից ընկերության գործունեությունը Հայաստանում կասեցնելու հիմք: Նշենք, որ որոշ վճարահաշվային կազմակերպություններ խուսափում են իրենց պաշտոնական կայքէջում նշել Լեռնային Ղարաբաղի մասին, քանի որ այդ դեպքում զրկվում են ադրբեջանական լիցենզիայից: «Բլիզկոյի» հետ կապված խնդիրն ավելի պարզ է: Այս համակարգը սերտ առնչություն ունի ադրբեջանական մի շարք բանկերի հետ, ու «մասնագիտացել է» Ադրբեջանի հետ փոխանցումներ կատարելու ուղղությամբ: Համակարգի սեփականատերը ռուսական «Սվյազ բանկն» է, որի բաժնետոմսերն էլ պատկանում են պետական «Վնեշէկոնոմ բանկին» («Банк развития и внешнеэкономической деятельности (Внешэкономбанк)»): Նշենք, որ այս տարի ՀՀ ԿԲ-ն դադարեցրել է նաեւ «Միգոմ» եւ «Զոլոտայա Կորոնա» համակարգերի գործունեությունը Հայաստանում: | |
|
Մեկնաբանություններ: 0 | |