15:50 Կառավարությունը վերանայել է 2013 թ. բյուջեի նախագիծը՝ պատգամավորների առաջարկների հիման վրա | |
Կառավարությունը ՀՀ Ազգային Ժողովից ստացել է 406 առաջարկություն՝ 2013 թ. պետական բյուջեի նախագծում փոփոխություն կատարելու համար; Այդ մասին այսօր՝ նոյեմբերի 29-ին ՀՀ կառավարության նիստում հայտարարեց ՀՀ ֆինանսների նախարար Վաչե Գաբրիելյանը: Նրա տեղեկացմամբ՝ առաջարկություններ ներկայացրել են եւ հանձնաժողովները, եւ խմբակցությունները, եւ անհատ պատգամավորները: Առաջարկությունները հիմնականում նախատեսում են բյուջետային հատկացումների ավելացում, որոշ դեպքերում՝ վերաբաշխում: Հարցադրումներ կան սոցիալ-տնտեսական քաղաքականության վերանայման մասին: Ընդհանուր առմամբ՝ պատգամավորներն առաջարկել են բյուջեի եկամուտներն ավելացնել 137,6 մլրդ դրամով, իսկ ծախսերը՝ 411 մլրդ դրամով: ՀՀ կառավարությունը համաձայնել է պետական բյուջեի եկամուտներն ու ծախսերն ավելացնել 1,2 մլրդ դրամով: Եկամուտների ավելացման հիմնական աղբյուրը (մոտ 1 մլրդ դրամ) լինելու են պաշտոնական դրամաշնորհները (արտասահմանից ստացվող անհատույց միջոցները); Դրամաշնորհների ավելացումը պայմանավորված է ինչպես փոխարժեքի ճշգրտմամբ, այնպես էլ նոր դրամաշնորհի ստացմամբ (Եվրոպական հարեւանությամբ ներդրումային ծրագիր): Ծախսերից ամենամեծ ավելացում՝ 1,5 մլրդ դրամի չափով, նախատեսվում է զոհված զինծառայողների բնակարանային պայմանների բարելավման համար: Սակայն կատավել է նաեւ 1,3 մլրդ դրամի այլ ծախսերի կրճատում: Պատգամավորների առաջարկներից ընդունվել են 67-ը, 137-ը մերժվել են, իսկ 202 առաջարկություն կքննարկվեն կառավարության հետագա ծրագրերում: | |
|
Մեկնաբանություններ: 0 | |