17:37 ԿԲ-ն կանխատեսել է տնտեսական աճի տեմպի դանդաղում եւ անփոփոխ թողել վերաֆինանսավորման տոկոսադրույքը | |
Հայաստանի Հանրապետության կենտրոնական բանկն այսօր՝ փետրվարի 12-ին որոշեց չփոփոխել վերաֆինանսավորման տոկոսադրույքը՝ տարեկան 8%: Նշենք, որ վերջին անգամ վերաֆինանսավորման տոկոսադրույքը փոխվել է 2011 թ. սեպտեմբերին` նվազեցվելով 0.5 տոկոսային կետով: ԿԲ հաղորդագրության մեջ նշվում է, որ 2013 թ. հունվարին արձանագրվել է 2.9% գնաճ, որի արդյունքում 12-ամսյա գնաճը կազմել է 2.6%՝ գտնվելով 4 ±1.5 % միջակայքի ստորին սահմանին մոտ: ՀՀ ԿԲ գնահատումների համաձայն, առաջին կիսամյակում 12-ամսյա գնաճը կավելանա՝ կանխատեսող հորիզոնում կայունանալով նպատակային ցուցանիշի շուրջ (4%): Նշվել է, որ զարգացած երկրների պարտքային հիմնախնդիրների քաղաքական լուծումների վերաբերյալ պահպանվող անորոշությունների պարագայում կանխատեսվող հորիզոնում ակնկալվում է համաշխարհային տնտեսական աճի տեմպերի դանդաղ վերականգնում: Նման պայմաններում ձեւավորվող ցածր արտաքին պահանջարկի ազդեցությամբ հիմնական հումքային եւ պարենային ապրանքների միջազգային գները կդրսեւորեն համեմատաբար կայուն վարքագիծ՝ պահպանվելով առկա բարձր մակարդակներում: ԿԲ խորհրդի կանխատեսմամբ՝ ակնկալվում է տնտեսական աճի որոշ չափով դանդաղում եւ ձեւավորում երկարաժամկետ կայուն մակարդակի շուրջ: Մասնավոր պահանջարկի սպասվող թուլացման եւ հարկաբյուջետային թույլ զսպող քաղաքականության ազդեցության արդյունքում ՀՀ տնտեսությունից ներքին գների վրա ակնկալվում է ոչ գնաճային ազդեցություն: ԿԲ խորհուրդը եզրակացրել է, որ կարճաժամկետ հատվածում առկա են գնանկումային ռիսկեր՝ կապված համաշխարհային տնտեսության վատատեսական հեռանկարների, եւ գնաճային ռիսկեր՝ կապված գազի սակագների հնարավոր թանկացման հետ: Ընդհանուր ազդեցության մեջ գերակայում են գնաճային ռիսկերը: Այս ռիսկերի դրսեւորման պարագայում ԿԲ խորհուրդը չի բացառում տոկոսադրույքի հետագա ճշգրտման հնարավորությունը: | |
|
Մեկնաբանություններ: 0 | |