17:07 Կենտրոնական բանկը 21 մլն դոլար է ծախսել` դրամը փլուզումից փրկելու համար | |
Հայաստանի Հանրապետության կենտրոնական բանկն անցյալ շաբաթ` մարտի 4-7 ժամանակահատվածում 21.5 մլն դոլար է վաճառել «ՆԱՍԴԱՔՕԷՄԷՔՍ Արմենիա» բորսայում: Այդ մասին տեղեկանում ենք ՀՀ ԿԲ պաշտոնական կայքէջից: Ակնհայտ է, որ դոլարային ինտերվենցիան իրականացվել է դրամի կտրուկ արժեզրկումը կանխելու նպատակով: Ամենայն հավանականությամբ` ինտերվենցիայի հիմնական մասը կատարվել է մարտի 4-ին, երբ բորսայում դոլարի փոխարժեքը բարձրացավ մինչեւ 411.42 դրամ: Դրանից հետո փոխարժեքը փոքր-ինչ կայունացավ, սակայն այս շաբաթ կրկին դրամը նահանջեց: Դրամի թուլացմանը կարող են նպաստել տարբեր գործոններ: Ավանդաբար` մարտ-ապրիլը դրամի համար բարենպաստ ամիսներ չեն, քանի որ տրասնսֆերտները կտրուկ նվազում են, հետեւաբար` շուկայում նվազում է դոլարի առաջարկը: Այս տարվա մարտը առանձնահատուկ է նաեւ նրանով, որ զբոսաշրջային այցելությունները հարեւան Իրանից նույնպես կտրուկ նվազել են, իսկ իրանցի զբոսաշրջիկները մեծ քանակությամբ դոլար էին բերում իրենց հետ: Մարտի առաջին շաբաթում տեղի է ունեցել նաեւ շրջանառությունում կանխիկ դրամի քանակի աճ, ինչը նույնպես կարող է նպաստել դրամի դիրքերի թուլացմանը: Այսպես` մարտի 7-ին կանխիկ դրամի քանակությունը հասել է 412 մլրդ դրամի` փետրվարի վերջի 398 մլրդ-ի համեմատ: | |
|
Մեկնաբանություններ: 0 | |