«Իրանական կոնսորցիումը պետք է ապահովի Ազգային հիմնադրամից վարկի ստացումը, իսկ Հայաստանի կողմից անհրաժեշտ է երաշխիքի տրամադրումը բանկին»,- ասաց Մ. Նամջուն: Սակայն, նրա խոսքով, նախագիծն իրականացնող ընկերությունը պարտավոր է հենց այսօրվանից սկսել աշխատանքը, այդ թվում՝ ուսումնասիրությունների իրականացումը, անհրաժեշտ սարքավորումների մատակարարումը, շինհրապարակի ստեղծումը: Պետք է նաեւ կառուցել էլեկտրահաղորդիչ գծեր: Իրանցի նախարարի խոսքով՝ ՀԷԿ-ի շինարարության ընթացքում, բնականաբար, կընդգրկվեն հայկական ընկերություններ, ինչն ավելի էժան կլինի, քան եթե բոլոր շինարարները գան Իրանից:

Նշենք, որ ՀԷԿ-ի կառուցումն իրականացնում է իրանական «Թավան Աբ Արազ» մասնավոր ընկերությունը: Եւ Իրանի էներգետիկայի նախարարը եւ ՀՀ էներգետիկայի եւ բնական պաշարների նախարար Արմեն Մովսիսյանը նշեցին, որ ՀԷԿ-ի շինարարությունն առեւտրային նախագիծ է, այսինքն՝ նախագիծն իրականացնող ընկերությունն առաջնորդվում է առավելագույն տնտեսական արդյունք ստանալու ակնկալիքով: Մ. Նամջունը Մեղրիի ՀԷԿ-ի արդյունավետությունը գնահատեց 1,7 գործակցով, ինչը բավականին բարձր է, Իրանում նման շինարարություն սկսում են նույնիսկ 1 գործակցի պարագայում: «Այս գետը (Արաքսը,-խմբ) բացառիկ է՝ գոյություն ունի կայուն հոսք, փոքրիկ պատվարներ կառուցելով՝ կարելի է մեծացնել ջրի ծավալը, 20 կմ տեղանքում հարմար վայր ստեղծել եւ 1700 գեգավատտ էլեկտրաէներգիա ստանալ»,- ասաց Մ. Նամջունը:

Ա. Մովսիսյանն ասաց, որ Մեղրիի ՀԷԿ-ի շինարարության համար սարքավորումների հիմնական մասը ներկրվելու է Իրանից, սակայն հնարավոր է՝ օգտագործվեն նաեւ հայկական արտադրության սարքավորումներ: