2013 թ. պետական բյուջեում նախկին ԽՍՀՄ Խնայբանկում մինչեւ 1993 թ. ունեցած ավանդները փոխհատուցելու համար նախատեսվել է 1,6 մլրդ դրամ: Այդ մասին այսօր՝ հոկտեմբերի 24-ին ՀՀ Ազգային Ժողովում հայտարարեց ՀՀ աշխատանքի եւ սոցիալական հարցերի նախարար Արտեմ Ասատրյանը՝ պատասխանելով «Օրինաց երկիր» խմբակցության գրավոր հարցմանը:

Նա հիշեցրեց, որ ավանդների փոխհատուցման ծրագիրը սկսել է 2006 թ., ու այդ նպատակով հաշվառվել է 62,8 հազ. մարդ (նշենք, որ առաջին փուլով փոխհատուցում պետք է ստանան 70 անց ընտանեկան նպաստի համակարգում ընդգրկված անձինք): Ա. Ասատրյանի տեղեկացմամբ՝ 2012 թ. հոկտեմբերի դրությամբ փոխհատուցում ստացել է արդեն 53,5 հազ. մարդ;

Նախորդ 6 տարիների ընթացքում ավանդների փոխհատուցման նպատակով պետական բյուջեից ծախսվել է մոտ 5,5 մլրդ դրամ:

Ծրագրի առաջին փուլը ամենայն հավանականությամբ կավարտվի 2013 թ., սակայն Ա. Ասատրյանը նշեց, որ այն կլինի շարունակական եւ կներառի նաեւ մյուս խմբերը: