12:04 Փոթիի գործադուլը դեռեւս չի խանգարում նավթամթերքների Հայաստան տեղափոխմանը | |
Փոթիի գործադուլը դեռեւս չի խանգարում նավթամթերքների Հայաստան տեղափոխմանը: Այս մասին, NEWS.am-ի թղթակցի հետ զրույցում ասաց վառելիք ներկրող հայկական երկու խոշորագույն ընկերություններից մեկի՝ «Ֆլեշի» փոխտնօրեն Մուշեղ Էլչյանն՝ անդրադառնալով Փոթիի նավահանգստի աշխատակիցների գործադուլի ազդեցությանը Հայաստան կատարվող բեռնափոխադրումների վրա: «մենք նավթամթերք ենք մատակարարում Բաթումիից, այլ ոչ՝ Փոթիից, ուստի գործադուլի հետ կապված դժվարություններ դեռ չենք զգում»,-հայտարարեց Էլչյանը: Ցորենի ներկրմամբ զբաղվող «Մանչո Գրուփ» ընկերության ղեկավար Իվան Մոսոյանն էլ նշեց, որ գործադուլի պատճառով Նովոռոսիյսկից եւ Ազովից ցորեն տեղափոխող նավերի ժամանումը հետաձգվել է: Ներկայումս ցորենը գտնվում է նավահանգստի էլեվատորներում, սակայն հետաձգման համար լրացուցիչ վճար չի գանձվում՝ շնորհիվ ռուս գործընկերների հետ մեր հին կապերի, պահեստներից օգտվելու համար վճարը հնարավոր է եղել հետաձգել մինչեւ նոյեմբերի 20-ը: «Ինչ վերաբերում է Բաթումիին, ապա մի շարք պատճառներով դեռեւս չի հաջողվում բոլոր բեռները Փոթիից ուղարկել Բաթումի»,-նշեց Մոսոյանը: Հիշեցնենք, որ Փոթիում առաջին գործադուլը հայտարարվել է հոկտեմբերի վերջին: Նոյեմբերի 1-ից գործադուլը վերսկսվել է, արգելափակված է նավահանգստի հզորությունների շուրջ 70 տոկոսը, աշխատակիցները սպառնում են հացադուլ սկսել: | |
|
Մեկնաբանություններ: 0 | |