«Թեև երկար ժամանակ է, ինչ Հայաստանի փոքր և միջին բիզնեսը կառավարության կողմից դիտարկվում է որպես տնտեսության զարգացման գերակա ուղղություններից մեկը և հայտարարվում է ՓՄՁ-ներին օժանդակելու նպատակով ՀՀ օրենքով պետության կողմից ղեկավարման նոր համակարգ ստեղծելու ուղղությամբ ձեռնարկվող քայլերի մասին, բայց և այնպես ոլորտի վիճակն այսօր չի կարելի բավարար համարել»,- «Փաստինֆո» լրատվական գործակալության թղթակցին տեղեկացրեց «Գործարարության և զարգացման կովկասյան ցանց»-ի Հայաստանի կազմակերպության ղեկավար Շուշան Խաթլամաջյանը:

Ըստ նրա՝ փոքր ձեռներեցությունը ոչ թե պարզապես տնտեսության մի բաժին է, այլ մարդու անհատական ունակությունների ներդրման և ինքնահաստատման բնական ոլորտ և միջին խավի ձևավորման մեխանիզմ:

Շ. Խաթլամաջյանը գտնում է, որ փոքր և միջին ձեռնարկատիրության ոլորտը նաև երկրի կայուն զարգացման, մրցունակության և, ընդհանրապես, կյանքի որակի բարձրացման հիմքն է: Տնտեսվարման այս ձևը, ըստ նրա կարող է նպաստել նաև երկրի փոքր քաղաքների և ավանների սոցիալական իրավիճակի բարելավմանը, մարդկանց առաջ կբացի զարգացման հեռանկարներ և, նույնիսկ, կթեթևացնի շահագործվող բնության ուսերին դրված ծանրությունը: