12:52 ՊԵԿ-ը երեք անգամ կնախզգուշացնի | |
Հարկային մարմիններն այս ամսվանից արդեն աստիճանաբար անցնելու են տնտեսվարող սուբյեկտների հետ աշխատանքի նոր, առավել բարեկիրթ մեթոդների: Եթե ՊԵԿ-ի ուսումնասիրությունները եւ վերլուծությունները որոշակի ռիսկեր են բացահայտել հարկատուի մոտ, ապա մինչ նրա մոտ ստուգումներ սկսելը եւ պատժիչ միջոցների կիրառումը նրան նախ 3 անգամ ծանուցում կուղարկվի` առաջարկելով ճշգրտել եւ շտկել այս կամ այն ցուցանիշը: Ծանուցումների հանդեպ անհետեւողական մոտեցման դեպքում հարկատուները պատասխանատվության միջոցներից չեն խուսափի: Հարկային մարմինները փորձում են ամրապնդել բարեկամական հարաբերությունները մեր հարկատուների հետ: Այդ նպատակով նախ կրճատվում են տնտեսվարող սուբյեկտների մոտ ստուգումները, որպեսզի նվազեցվի տնտեսվարողների դժգոհությունը երբեմն անհարկի միջամտությունից իրենց գործերին: Հիշեցնեմ` այս տարեսկզբից ՊԵԿ-ն անցել է առավելապես ռիսկերի վրա հիմնված ստուգումների: Այսինքն` ստուգումներ բացվում են միայն այն ժամանակ, երբ ՊԵԿ-ի վերլուծությունները ռիսկային տարրեր են բացահայտում տնտեսվարողների գործունեության մեջ. երբ հաշվետվությունների համեմատություններից եւ վերլուծություններից ելնելով կասկածում են, որ նա, ասենք, թաքցնում է իր աշխատակիցների իրական թվաքանակը, նրանց վճարվող աշխատավարձի իրական չափը կամ շրջանառության իրական ծավալները: Իսկ արդեն այս հուլիսից ՊԵԿ-ը խոստանում է ռիսկային գնահատված տնտեսվարողների հանդեպ ստուգումների եւ տույժ ու տուգանքների անցնել նախ էլեկտրոնային փոստով կամ գրավոր կերպով նրանց 3 անգամ իրազեկելուց հետո: ՊԵԿ-ի մասնագետները մինչ այս փոփոխություններին անցնելն ուսումնասիրել են Մեծ Բրիտանիայի առաջադեմ փորձը եւ որոշել այնտեղից հարկատուների հետ շփման բարեկիրթ մոդել ներբերել Հայաստան: Նախ մեղմ տեղեկացում, ապա` առաջարկ, եւ երրորդ ծանուցմամբ միայն հիշեցում, որ հարկային մարմինների հետ հարաբերությունները չսրբագրելու դեպքում պատասխանատվության միջոցներն անխուսափելի են: Վարչարարական միջոցները` չափագրում, ստուգում, հսկիչ գնումներ, գործի կդրվեն միայն երեք անգամ ծանուցելուց հետո. վստահեցնում է պետեկամուտների կոմիտեի նախագահի տեղակալ Արմեն Ալավերդյանը: | |
|
Մեկնաբանություններ: 0 | |