21:08 Սիրիահայերը հանդիպել են գյուղատնտեսության ոլորտի պատասխանատուների հետ | |
 Հայաստանի սփյուռքի նախարարությունը պարբերաբար կազմակերպում է հանդիպում-խորհրդակցություններ Հայաստանում բիզնես գործունեություն ծավալելու ցանկություն ունեցող սիրիահայերին անհրաժեշտ մասնագիտական խորհրդատվություն ապահովելու նպատակով: Սփյուռքի նախարարության մամուլի ծառայությունից հայտնում են, թե դեկտեմբերի 5-ին գյուղատնտեսության ոլորտով հետաքրքրվող սիրիահայերը հնարավորություն ունեցան Հայաստանի գյուղատնտեսության ոլորտի վերաբերյալ պարզաբանումներ ստանալ ՀՀ գյուղատնտեսության նախարար Սերգո Կարապետյանից: Գյուղատնտեսության նախարարը տեղեկացրեց, որ Հայաստանի Հանրապետության նախագահը գյուղատնտեսությունը գերակա ուղղություն է հայտարարել, մշակվում ու իրականացվում են ոլորտի զարգացմանը նպաստող բազմաթիվ ծրագրեր: Ուսումնասիրվում եւ ներդրվում է համաշխարհային փորձը, բերքատվության արդյունավետությունը ապահովելու նպատակով վերանայվում ու կատարելագործվում են տեխնոլոգիաները: Գյուղնախարարի խոսքով գյուղատնտեսության ոլորտի զարգացմանն են ուղղված ցածր տոկոսադրույքով վարկային ծրագրերի ներդրումը, ներկրված գյուղատնտեսական պարագաների ու տեխնիկայի ներմուծման դեպքում ԱԱՀ-ից ազատումը: Նախարարը հավաստիացրեց, որ սիրիահայերի կողմից գյուղատնտեսական գործունեություն ծավալելու հստակ որոշման պարագայում պետությունը կօժանդակի կազմակերպության գրանցման, տարածքի որոնման, անհրաժեշտ խորհրդատվության, բիզնեսի ուղղորդման հարցում: Այնուհետեւ ՀՀ սփյուռքի եւ գյուղատնտեսության նախարարները պատասխանեցին սիրիահայերին հուզող հարցերին: Հանդիպմանը ներկա էին նաեւ Հայկական բերքի առաջմղման (ՀԲԱ) կենտրոնի ներկայացուցիչները, ովքեր ներկայացրեցին Հայաստանում ջերմոցային տնտեսությունների զարգացման, խաղողի քիշմիշ տեսակի այգիների հիմնման ծրագրերը: Այնուհետեւ պատասխանեցին սիրիահայերի հարցերին, որոնք վերաբերում էին ջերմոցային գործունեություն սկսելու դեպքում վարկերի ստացման հնարավորություններին, Հայաստան ագրոտեխնիկա ներմուծելու առանձնահատկություններին: Խորհրդակցության մասնակիցները պարզաբանումներ ստացան հակակարկտային տեխնիկայի կիրառման եւ գյուղատնտեսության ոլորտի հնարավոր ռիսկերի վերաբերյալ: Հանդիպման ավարտին ՀՀ սփյուռքի նախարար Հրանուշ Հակոբյանը ողջունեց սիրիահայերի Հայաստանում հաստատվելու եւ գյուղատնտեսության զարգացմանը մասնակցելու որոշումը: Նախարարը շնորհակալություն հայտնեց ՀՀ գյուտաղտնեսության նախարարին՝ անհրաժեշտ մասնագիտական պարզաբանումների համար: | |
|
| |
| Մեկնաբանություններ: 0 | |
