Պաշտոնական տեղեկություն չկա այն մասին, որ Թուրքիայից լոլիկ է ներկրվում Հայաստան: Այդ մասին, այսօր` դեկտեմբերի 14-ին, լրագրողների հետ հանդիպման ժամանակ ասաց ՀՀ գյուղատնտեսության փոխնախարար Գառնիկ Պետրոսյանը:

Նա չբացառեց, որ Վրաստանից ներկրվող լոլիկի մի մասը թուրքական ծագում ունի, սակայն ներկրողներն այն ներկայացնում են որպես վրացական: 2012 թ. 9 ամսում, ըստ պաշտոնական տեղեկությունների, Հայաստան է ներկրվել 165 տոննա լոլիկ` հիմնականում Վրաստանից, Հունաստանից եւ Իրանից: «4-5 տարի առաջ լոլիկները ներկրվում էին թուրքական փաթեթավորմամբ` արկղերի վրա թուրքական մակնշումով: Սակայն այս տարի նման արկղեր չեմ հանդիպել»,- ասաց գյուղատնտեսության փոխնախարարը:

Գ. Պետրոսյանի տեղեկացմամբ` Հայաստանում իսպառ կվերանա լոլիկի ներկրման պահանջը, եթե ջերմոցային տնտեսություններն ավելի արդյունավետ աշխատեն: Ինչպես եւ խորհրդային տարիներին, հայաստանյան ջերմոցներում ներկայում լոլիկի բերքատվությունը 1 քառ. մետրից կազմում է 20-22 կգ, այնինչ եվրոպական երկրներում 40 կգ-ից պակաս չէ: Գ. Պետրոսյանի կարծիքով` հայաստանյան ջերմոցներում ջերմային ռեժիմը կայուն չէ, հաճախակի ջերմության տատանումներ են տեղի ունենում, բույսը ենթարկվում է սթրեսի, ինչն էլ պատճառ է դառնում բերքատվության անկման:  Դա էլ իր հերթին բերում է ինքնարժեքի բարձրացման: