«Ведомости» թերթը հայտնում է, որ Մոսկվայի իշխանությունները կարող են թույլատրել մետրոյի կայարանների մուտքի մոտ առևտրի կենտրոնների կառուցումը։ Այդ նախագծի մասին հայտնել է Մոսկվայի քաղաքապետարանի տրանսպորտի վարչության պետ Մաքսիմ Լիկսուտովը։
«Մենք ցանկանում ենք, որ մետրոպոլիտենը եկամուտներ ունենա ոչ միայն ուղևորափոխադրումների, այլ նաև իրեն պատկանող առևտրային տարածքների օգտագործման հաշվին»,- ասել է վարչության պետը։
Մաքսիմ Լիկսուտովի խոսքերով, 2011 թվականին «Մոսկովյան Մետրոպոլիտենի» ընդհանուր եկամուտը կազմել է 5,96 մլրդ ռուբլի: Մետրոյի անցումներում կան 4000 կետից ավել առևտրի կրպակներ, որից տարեկան գալիս է 500 մլն ռուբլի եկամուտ: Այժմ հիմնական նպատակն է համարվում այդ եկամուտների ավելացումը մինչև տարեկան 10 մլրդ ռուբլի:
Ըստ Ведомости -ի՝ նախագծով հետաքրքրված է մոտ 20 ներդրող, որոնցից են` «Տաշիր» ընկերությունը, «Կոնտի» ընկերությունը, «АДГ-групп» ընկերությունը, «Сити-XXI век» կառույցը և այլ ընկերություններ և կազմակերպություններ:
Ներդրողների թվում է նաև «Տաշիր» ընկերությունների խումբը, որը պատկանում է գործարար Սամվել Կարապետյանին։ «Տաշիր»-ը, ըստ Ведомости-ի, ցանկանում է 11 օբյեկտ կառուցել։