Ապրիլի 23-ին Երևանում տեղի ունեցավ տնտեսական համագործակցության հարցերով հայ-լեհական միջկառավարական համատեղ հանձնաժողովի 3-րդ նիստը:

Հանձնաժողովի համանախագահներն են. հայկական կողմից` Հայաստանի Հանրապետության էկոնոմիկայի նախարարի տեղակալ Արա ՊԵՏՐՈՍՅԱՆԸ, լեհական կողմից` Լեհաստանի Հանրապետության էկոնոմիկայի նախարարի տեղակալ Տոմաշ ՏՈՄՉԻԿԵՎԻՉԸ:

Նիստի ընթացքում հանձնաժողովի անդամները ամփոփեցին նախորդ նիստի արձանագրությամբ ձեռք բերված պայմանավորվածությունների կատարման արդյունքները, քննարկեցին Հայաստանի և Լեհաստանի միջև առևտրատնտեսական, ֆինանսական, ներդրումային, գյուղատնտեսության, առողջապահության և մաքսային ոլորտներում համագործակցության ներկա վիճակը և զարգացման հեռանկարները, երկու երկրների միջև ապրանքների և ծառայությունների առևտրաշրջանառության ծավալների ավելացման հնարավորությունները, ինչպես նաև Հայաստանի և Լեհաստանի միջև միջմարզային կապերի խորացմանն առնչվող խնդիրներ: Հատուկ ուշադրություն դարձվեց ԵՄ-ի հետ համագործակցության ծրագրերին, մասնավորապես` Արևելյան Գործընկերության նախաձեռնության ծրագրերի իրականացման ակտիվացման ուղղությամբ:

Տնտեսական համագործակցության հարցերով հայ-լեհական միջկառավարական հանձնաժողովի 3-րդ նիստի ավարտին հանձնաժողովի համանախագահները ստորագրեցին համապատասխան արձանագրություն, որում ամրագրվեցին նիստի ընթացքում ընդունված որոշումները:

Լրացուցիչ տեղեկատվություն

Տնտեսական համագործակցության հարցերով հայ-լեհական միջկառավարական համատեղ հանձնաժողովը հիմնվել է համաձայն 2010թ. մարտի 12-ին կնքված «Հայաստանի Հանրապետության կառավարության և Լեհաստանի Հանրապետության կառավարության միջև տնտեսական համագործակցության վերաբերյալ» Համաձայնագրի: Հանձնաժողովի անդրանիկ նիստը կայացել է 2010թ. հուլիսի 13-ին` Երևանում: Երկրորդ նիստը տեղի է ունեցել 2011թ. հուլիսի 7-ից 8-ը` Վարշավայում:

2012թ. սեպտեմբերի վերջի դրությամբ Հայաստանի Հանրապետության իրական հատվածում Լեհաստանի Հանրապետությունից կատարված ներդրումների համախառն հոսքերը կազմել են 0.2 հազ ԱՄՆ դոլար:

Հայաստանի Հանրապետությունում 01.09.2012 թ.-ի դրությամբ գրանցված են լեհական կապիտալի մասնակցությամբ 13 ձեռնարկություններ:

2012թ. Հայաստանի և Լեհաստանի միջև առևտրաշրջանառությունը կազմել է 42.4 մլն ԱՄՆ դոլար, որից արտահանումը կազմել է 599.3 հազ. ԱՄՆ դոլար և ներմուծումը` 41.8 մլն ԱՄՆ դոլար:

Հիմնականում Հայաստանից Լեհաստան արտահանվում են հետևյալ ապրանքատեսակները. կաուչուկ, խմիչքներ, աղ, ցեմենտ, քար, կրաքար, ալյումին: Լեհաստանից Հայաստան ներմուծվում են. եթերային յուղեր, օճառ, մակերեսային ակտիվ օրգանական միջոցներ, փայտ և փայտից իրեր, էլեկտրական սարքավորումներ, թուղթ, շաքար, կակաո, ապակի, դեղագործական ապրանքներ և այլն: