Կառավարության մամուլի ծառայությունից հայտնում են, թե, անցնելով օրակարգային հարցերին, խորհուրդը նախ ամփոփել է 2009-2012 թվականներին իրականացված աշխատանքները, ներկայացվել է Հայաստանի երիտասարդության ազգային զեկույցի երկրորդ` վերլուծական մասը:

Այնուհետեւ խորհուրդը քննարկել է «Հայաստանի Հանրապետության երիտասարդական պետական քաղաքականության 2013 2017 թթ. ռազմավարությունը եւ միջոցառումների ծրագիրը: Վարչապետ Սարգսյանը հանձնարարել է ներկայացված մի շարք առաջարկությունների հիման վրա լրամշակել այն, որից հետո ներկայացնել ՀՀ կառավարության հաստատմանը:

ՀՀ սպորտի եւ երիտասարդության հարցերի փոխնախարար Արսեն Քարամյանն, անդրադառնալով «Երիտասարդ ընտանիքին` մատչելի բնակարան» պետական նպատակային ծրագրի կատարման ընթացքին,  տեղեկացրել է, որ դրա շրջանակներում հաստատվել է 987 վարկ՝ ընդհանուր 7 մլրդ 220 մլն դրամ ծավալով: Ընդ որում, 491 վարկերը հաստատվել են Երեւանում, իսկ 484-ը՝ ՀՀ մարզերում, ինչը բխում է տարածքային համաչափ զարգացման քաղաքականությունից: 

Նիստում համառոտ ներկայացվել են ՀՀ երիտասարդական պետական քաղաքականության ոլորտում 2012 թ. իրականացված ծրագրերը, ՀՀ խորհրդի կողմից հավանության արժանացած երիտասարդական պետական քաղաքականության շրջանակներում գործող առցանց դրամաշնորհային համակարգի գործունեությունը: Միաժամանակ, հաստատվել է նաեւ առցանց համակարգի նոր փորձագետների կազմը:

Անդրադարձ է կատարվել ՀՀ մարզպետարանների աշխատակազմերում երիտասարդական քաղաքականությամբ զբաղվողի հաստիքի առանձնացման հնարավորության եւ ՀՀ մարզպետներին կից երիտասարդական խորհուրդների ձեւավորման հարցերին, ինչպես նաեւ հանրապետությունում տարվա երիտասարդական մայրաքաղաք հռչակելու նպատակով աշխատանքային խմբի ձեւավորմանը: