Հիշեցնենք, որ առաջին փուլում բուժհիմնակներում բացահայտվեցին հակամրցակցային համաձայնությունների դեպքեր, տուգանվեցին մի շարք ընկերություններ, այդ թվում՝ դեղերի ներկրմամբ զբաղվող խոշորագույն «Նատալի ֆարմ» ընկերությունը տուգանվեց 50 միլիոն դրամի չափով:

Երկրորդ փուլում Հանձնաժողովն ուսումնասիրել է 134 հիվանդանոցներ եւ դեղերի ներկրմամբ, արտադրությամբ ու վաճառքով զբաղվող մոտ 300 ընկերություններ: Պարզվել է, որ վերոնշյալ 134 բուժհաստատություններից մոտ 100-ը անհրաժեշտ դեղորայքը ձեռք են բերել առանց մրցույթների անցկացման: Մրցույթներ չհայտարարելու հետեւանքով հիվանդանոցները դեղերը ձեռք են բերել շուկայականից մինչեւ անգամ եռակի թանկ գնով: Օրինակ, հակաբորբոքային  «ցեֆտրիաքսոն» դեղամիջոցը որոշ հիվանդանոցներ գնել են 850 դրամով, այն դեպքում, երբ իրական արժեքը 190 դրամ է, պետությունը անհամեմատ թանկ է վճարել նաեւ «նատրիումի քլորիդի» համար՝ 150-ի փոխարեն 350 դրամ: Ընդհանուր առմամբ՝ պետբյուջեին հասցված վնասը կազմում է 1,5 մլրդ դրամ:

Հայտնաբերվել են նաեւ այլ խախտումներ: ՏՄՊՊՀ ուսումնասիրությունները փաստում են, որ հիվանդանոցների տնօրենները հիվանդներին մշտապես ուղղորդել են միեւնույն դեղատունը, որտեղից վերջինները ստացել են անվճար դեղորայքը, իսկ դրա համար իրական արժեքից մի քանի անգամ ավելի թանկ վճարել է  պետությունը: Օրինակ,սրտանոթային հիվանդությունների բուժման համար նախատեսված եւ սոցիալական կարեւոր նշանակության «ամլոդիպին» դեղամիջոցի գինը 850 դրամ է, մինչդեռ հիվանդանոցն այն ձեռք է բերել 6 անգամ թանկ՝4800 դրամով, նույն կերպ էլ ուռճացված արժեքով են գնվել նաև մեծ պահանջարկ ունեցող այնպիսի դեղամիջոցներ, ինչպիսիք են՝ «պրեդուկտալը», «տաուֆոնը», «դիլատրենտը», «վերոշպիրոնը» եւ այլն:   

Ըստ ՏՄՊՊՀ ուսումնասիրությունների, խախտումներն առավելապես  գերակշռում են մարզերում, իսկ առավել վատթար վիճակ է հատկապես Շիրակի մարզում, որտեղ մրցույթներ ընդհանրապես չեն իրականացվել: Բարվոք իրավիճակ չէ նաեւ Լոռու մարզում, որտեղ չի անցկացվել նախատեսված մրցույթների ավելի քան 50%-ը:

Հանձնաժողովի որոշմամբ, պետական միջոցների յուրացման եւ չարաշահման վերաբերյալ փաստերը անմիջապես կուղարկվեն ՀՀ Գլխավոր դատախազություն: