Մարզային տնտեսվարողները Հանձնաժողովի նիստում արդարացան, որ մարզերում «սփրեդ» անունը սպառողներին հայտնի չէ, այդ պատճառով սփրեդը վաճառում են որպես էժան կարագ: Ինչպես «Նալբանդյան եղբայրներ» ՍՊԸ-ի (ք. Վանաձոր) տնօրենն ասաց՝ միտումնավոր չեն խախտել ու գերշահույթներ չեն ունեցել, այսինքն՝ սփրեդը կարագի գնով չեն վաճառել:  Իսկ Աշտարակի «Ավգոռ» սուպերմարկետի գլխավոր հաշվապահն ասաց, որ ներկայում որեւէ նմանատիպ խախտում չկա՝ սփրեդը սպառողին ներկայացնում են որպես սփրեդ:

«Առաջարկում եմ համեմատաբար մեղմ մոտենալ, հաշվի առնելով, որ մարզերում շրջանառության ծավալները փոքր են: Բավարարվենք նախազգուշացում տալով; Բայց եթե երկրորդ անգամ նույն սուբյեկտի մոտ խնդիրներ բացահայտենք, մեր մոտեցումը կլինի շատ խիստ»,- հանձնաժողովի նիստում ասաց Ա. Շաբոյանը; Իրավախախտ ընկերություններն են՝ «Արմեն Ղազարյան» ԱՁ, «Մհեր Բարսեղյան» ԱՁ, «Ավգոռ» ՍՊԸ, «Բազիս Ս.Ա.Ռ.» ՍՊԸ, «Դիետ» ՍՊԸ, «Նալբանդյան եղբայրներ» ՍՊԸ, «Ռոստոմ եւ Զոհրաբ» ՍՊԸ եւ «Սանի սիթի» ՍՊԸ: Բոլոր այդ տնտեսվարողներին հայտարարվեց խիստ նախազգուշացում:

Նշենք, որ Երեւանում տնտեսվարողների մոտ հայտնաբերված նմանատիպ խախտումների համար ՏՄՊՊՀ-ն դրամական տուգանքներ է նշանակել՝ նախորդ տարվա հասույթի մինչեւ 1%-ի չափով: 

ՏՄՊՊՀ նախագահ Ա. Շաբոյանը  ասաց, որ թեեւ Հանձնաժողովի ռեսուրսները սահմանափակ են, իրենք շարունակելու են պարբերաբար ստուգայցեր կատարել մարզերում: Ա. Շաբոյանը կոչ արեց տեղական ինքնակառավարման մարմիններին եւ քաղաքացիներին՝ անբարեխիղճ մրցակցության դեպքերի մասին անպայման տեղյակ պահել Հանձնաժողովին:

ՏՄՊՊՀ-ն հայտնաբերված խախտումների մասին ողջ տեղեկատվությունը կփոխանցի նաեւ ՀՀ Գյուղատնտեսության նախարարության Սննդամթերքի անվտանգության պետական ծառայությանը: