16:57 Վարչապետը ծանոթացել է սննդի եւ դեղերի անվտանգության փորձագիտական ժամանակակից լաբորատորիայի գործունեությանը | |
Վարչապետ Տիգրան Սարգսյանն այցելել է Կոտայքի մարզի Նոր Գյուղ համայնքում «Տոնուս-լես» ընկերության կառուցած սննդի եւ դեղերի անվտանգության փորձագիտական ժամանակակից լաբորատորիա: Ինչպես NEWS.am-ին տեղեկացրին Կառավարության մամուլի ծառայությունից, վարչապետը ՀՀ էկոնոմիկայի եւ Առողջապահության նախարարներ՝ Տիգրան Դավթյանի ու Դերենիկ Դումանյանի ուղեկցությամբ շրջել է լաբորատորիայում՝ ծանոթացել փորձագիտական աշխատանքների ընթացքին: Ըստ կառավարության հաղորդագրության՝ ներդրումային ծրագիրը կազմել է մոտ 1.3 մլրդ դրամ, որի շնորհիվ ՀՀ էկոնոմիկայի նախարարության հետ կնքված համապատասխան պայմանագրի համաձայն՝ ծրագրի շրջանակներում կստեղծվի առնվազն 50 աշխատատեղ, որից 20-ն արդեն իսկ ստեղծվել է: Ընկերությունում այժմ աշխատում է 97 մարդ` 100 հազ. դրամ միջին աշխատավարձով: Վարչապետը մեծապես կարեւորել է նման ժամանակակից լաբորատորիայի գործունեությունը՝ նշելով, որ հանրապետության բոլոր սնունդ արտադրողները պարտավոր են հանրությանը մատուցել բարձրորակ արտադրանք, հակառակ պարագայում նման լաբորատորիաների միջոցով անմիջապես կպարզվեն բոլոր թերությունները: «Մեր նպատակն է հանրապետությունում ստեղծել նման լաբորատոր փորձագիտական ցանց, առանց որի եզրակացության՝ որեւէ արտադրանք չի մատուցվի հանրությանը»,- ասել է Տիգրան Սարգսանը: Ներդրումային ծրագրի շրջանակներում ՀՀ կառավարության որոշմամբ ընկերության կողմից ներմուծված ապրանքների համար մաքսային մարմինների կողմից հաշվարկվող ավելացված արժեքի հարկի վճարման ժամկետը հետաձգվել է երեք տարի ժամկետով: «Տոնուս-լես» ընկերության ղեկավար Լեւոն Հակոբյանը շնորհակալություն է հայտնել վարչապետին՝ նման արտոնություն տրամադրելու համար, եւ նշել, որ առանց դրա հնարավոր չէր լինի իրականացնել այս ներդրումային ծրագիրը: Լաբորատորիան հնարավորություն է տալիս հանրապետությունում արտադրվող, ինչպես նաեւ ներկրվող դեղերի ու սննդի համար իրականացնել որակի եւ կենսահամարժեքության, ինչպես նաեւ կենսաբանական եւ մանրէաբանական փորձաքննություններ` նպաստելով դրանց որակական չափանիշների ապահովմանը, որն էլ իր հերթին կխթանի տեղական որակյալ ապրանքների արտադրությունը եւ արտահանումը: Լաբորատորիան ունի գերմանական, շվեյցարական, ճապոնական եւ իսրայելական արտադրության ժամանակակից սարքավորումներ, որոնց արժեքը նախապես պետք է կազմեր մոտ 310 մլն դրամ, սակայն աշխատանքների իրականացման արդյունքում այն արդեն իսկ գերազանցում է 470 մլն-ը: Ներկայում ընթացքի մեջ է լաբորատորիայի միջազգային ISO 9001-2008 հավատարմագրման հետ կապված գործընթացը: | |
|
Մեկնաբանություններ: 0 | |