Վերահսկիչ պալատի նախագահ Իշխան Զաքարյանը ԱԺ սոցիալական հարցերի մշտական հանձնաժողովի նիստում ներկաների գնահատմանն է ներկայացրել պալատի 2013 թ. գործունեության տարեկան ծրագիրը: ՎՊ-ն առանձնացրել է ուսումնասիրության 17 ուղղություն: Ծրագրի թիրախը, ըստ Իշխան Զաքարյանի, գնումների համակարգն է ու նախահաշիվները քաղաքաշինության ոլորտում: Վերլուծությունը մասնագետներին բերել է համոզման, որ հենց այս երկու ոլորտներում են հիմնականում փոշիանում բյուջետային միջոցները: Ծրագրով նախատեսվում է ուսումնասիրություններ կատարել մի շարք նախարարություններում, ինչպես նաեւ ՀՀ նախագահի, Ազգային ժողովի եւ կառավարության աշխատակազմերում:

ՎՊ նախագահը հանձնաժողովի նիստում տեղեկացրել է, որ ծրագիրն առանձին քննարկվել է խորհրդարանական բոլոր քաղաքական ուժերի հետ, նաեւ նախատեսվում է պալատի աշխատանքներին մասնակցելու հնարավորություն տալ յուրաքանչյուր խմբակցությունից մեկական պատգամավորի: Գագիկ Մինասյանն այս նորամուծությունները կարեւոր է համարել եւ նկատել, որ պատգամավորներին գործնականում տրվում է ՎՊ խորհրդի անդամի լիազորություն:

Իշխան Զաքարյանը հնարավոր է համարել ծրագրի լրացուցիչ մասում ընդգրկել նաեւ պետական ծառայողների սոցիալական փաթեթները, ինչի վերաբերյալ առաջարկ էր ստացել խմբակցությունից: Հնչել են նաեւ այլ առաջարկներ, որոնք ծրագրում արտացոլելու պատրաստակամություն հայտնեց բանախոսը: Հանձնաժողովը ՎՊ ծրագիրը դրական է գնահատել:

Բացի այդ, ՀՀ Ֆինանսների նախարարի տեղակալ Վարդան Արամյանը հանձնաժողովի հաստատամանն է ներկայացրել երկու համաձայնագիր: Հայաստանի եւ Եվրոպական ներդրումային բանկի միջեւ ստորագրված «Երեւանի մետրոպոլիտենի վերակառուցում-առաջին փուլ» ֆինանսական պայմանագրում փոփոխություն կատարելու մասին» համաձայնագիրը որոշակի փոփոխություններ է առաջարկում ֆինանսական պայմանագրի տեխնիկական նկարագրում: Հայաստանի եւ Վերակառուցման եւ զարգացման եվրոպական բանկի միջեւ ստորագրված «Երեւանի մետրոպոլիտենի վերակառուցման ծրագիր» վարկային համաձայնագրով բանկը Հայաստանին կտարամդրի 5 մլն եվրոյի վարկ՝ մետրոյի թունելների վերակառուցման, կայարանների ու ծառայողական շինությունների բարելավման, վագոնների արդիականացման, դրենաժային թունելի վերանորոգման նպատակով: Գլխադասային հանձնաժողովը դրական եզրակացություն է տվել համաձայնագրերին ընդգրկելու քառօրյա նիստերի օրակարգում: