00:35 Վերջին երկու տարիներին հայ-իրաքյան հարաբերություններն սկսել են բավականին ինտենսիվ զարգանալ. փոխվարչապետ | |
 Հայաստանը հետաքրքրված է Իրաքի հետ հարաբերությունները բոլոր ուղղություններով զարգացնելու հարցում: Այս մասին, երեկ՝ հունիսի 25-ին, հայտարարել է ՀՀ փոխվարչապետ, Տնտեսական համագործակցության հարցերով հայ-իրաքյան միջկառավարական համատեղ հանձնաժողովի համանախագահ Արմեն Գեւորգյանը՝ Իրաքի նորանշանակ դեսպան Ղազի Տահեր Խալեդի հետ հանդիպման ժամանակ: ՏԿՆ մամուլի ծառայությունից հայտնում են, որ փոխվարչապետը շնորհավորել է դեսպանին նշանակման կապակցությամբ եւ հաջողություն մաղթել հետագա գործունեության մեջ` նկատելով, որ նա առաքելությունն ստանձնում է մի փուլում, երբ երկկողմ հարաբերություններում դինամիկ զարգացում է նկատվում: Ա. Գեւորգյանը նշել է, որ վերջին երկու տարիներին հայ-իրաքյան հարաբերություններն սկսել են բավականին ինտենսիվ զարգանալ. ձեւավորվել է միջկառավարական հանձնաժողովը, որի առաջին նիստը կայացել է 2012թ-ին, Բաղդադում: Հաջորդ նիստը նախատեսվում է անցկացնել այս աշնանը, Երեւանում: «Հանձնաժողովն իր գործունեությամբ ավելի համակարգված բնույթ կհաղորդի երկկողմ հարաբերություններին եւ կնպաստի առեւտրատնտեսական կապերի ընդլայնմանը»,-նշել է Ա. Գեւորգյանը՝ հավելելով, որ գործարար շրջանակում արդեն կոնկրետ ոլորտներում փոխգործակցության վերաբերյալ հետաքրքրություն է նկատվում: Նա հույս է հայտնել, որ երկուստեք ամեն ինչ կարվի, որպեսզի այդ հետաքրքրությունը վերածվի համագործակցության կոնկրետ ծրագրերի: Դեսպանն իր հերթին նշել է, որ Իրաքի իշխանությունները շահագրգռված են բարեկամ Հայաստանի հետ հարաբերությունների խորացմամբ, եւ չկա որեւէ խոչընդոտ` երկու երկրների միջեւ լավագույն հարաբերություններ հաստատելու համար: Իր նշանակումը եւ դեսպանատան վերաբացումը նա համարել է դրա վկայությունը: Ըստ նրա` երկկողմ համագործակցության զարգացման համար լավ հող է նախապատրաստված: | |
|
| |
| Մեկնաբանություններ: 0 | |
