«Բարև Երևան» խմբակցության անդամներն այսօր  վարչական դատարան են մուտք արել  քաղաքապետ Տարոն Մարգարյանի երկու որոշումներից մեկը անվավեր, մյուսը` առոչինչ  ճանաչելու  պահանջով հայցադիմումը: Այս մասին ասուլիսի ընթացքում նշեց խմբակցության անդամ  Ստյոպա  Սաֆարյանը:

«Մենք դիմել ենք, քանի որ  այդ որոշումը միայն կասեցվել է, և պարզ է, որ քաղաքապետը չի  հրաժարվել  իր որոշումից», - նշեց նա:

Նա նշեց, որ հայցադիմումը  բաղկացած է  9 էջից, քանի  որ քաղաքապետի կողմից արված խախտումներն իրոք շատ են եղել:

«Քաղաքապետը մեր  հիշեցնելուց հետո  նոր հիշել է, որ հաշվի չի առել  անապահով  խավին: Սա դեռ առաջին խախտումն է, որ մենք ներառել ենք մեր հայցադիմումում», - նշեց Ս. Սաֆարյանը:

Վերջինս նշեց, որ ուցեվարձի  թանկացման մասին որոշումը, որպես իրավական ակտ, պետք է  ուժի  մեջ մտներ միայն  որոշումից 10 օր անց, այնինչ  ուղեվորները 5 օրվա համար  վճարել են ավել գումար, որը բանախոսի կարծիքով, պետք է  փոխհատուցվի:

Անդրադառնալով տրոլեյբուսի  ուղեվարձի թանկացմանը, խմբակցության անդամը նշեց, որ  քաղաքապետն իրավունք չունի բարձրացնել այս  փոխադրամիջոցի  ուղեվարձը: «Տարոն Մարգարյանի լիազորությունների մեջ չի մտնում տրոլեյբուսի թանկացումը», - հայտրարաեց նա:

Հայցադիմումը որպես վարույթ ընդունելուց հետո, խմբակցությունը, Ս. Սաֆարյանի խոսքերով, սկսելու է  ստորագրահավք, որպեսզօ  հնարավոր  լինի առանձին քաղաքացիների  միացումն իրենց նախաձեռնությանը: Նա նաև նշեց, որ  իրենց միանալու  կոչով դիմել են  նաև ԲՀԿ խմբակցությանը: