Այսպիսով, Համաշխարհային բանկը նվազեցրել է 2013թ. համաշխարհային տնտեսության աճի կանխատեսումը, որը պայմանավորված է զարգացած երկրներում սպասվածից ավելի դանդաղ վերականգնմամբ: Բանկի փորձագետները նաեւ նախազգուշացնում են, որ ԱՄՆ-ում  բյուջեի եւ  պետպարտքի վերին շեմի վերաբերյալ վեճերը կարող են վնաս հասցնել համաշխարհային տնտեսությանը:

Նվազեցվել են նաեւ զարգացող երկրների վերաբերյալ կանխատեսումները, քանի որ դրանց տնտեսությունը նախորդ տարի աճել էր շատ դանդաղ  տեմպերով: 2013թ. աճի կանխատեսումը նվազեցվել է մինչեւ 5,5%-ի` հունիսի 5,9% կանխատեսման փոխարեն: Հաջորդ տարի աճը մի փոքր կավելանա եւ կկազմի 5,7%, իսկ 2015թ. այն կհասնի 5,8%-ի:

Մինչեւ վերջին համաշխարհային ֆինանսական ճգնաժամը զարգացող երկրները միջինը ցուցաբերել են 7,5% աճ, իսկ Չինաստանի տնտեսությունն աճել է տարեկան 10%, հայտնում է «Վեստի էկոնոմիկան»:

Համաշխարհային բանկի փորձագետներն ակնկալում են, որ այս տարի Չինաստանի տնտեսությունը կաճի 8,4%-ով, սակայն 2015թ. կդանդաղի մինչեւ 7,9%-ի: Այս տարի զարգացած երկրների տնտեսական աճը կկազմի  ընդամենը 1,3%: Ցուցանիշը 2014թ. պետք է աճի  2%-ով, իսկ  2015թ.՝ 2,3% -ով: ԱՄՆ-ում 2013թ. աճը կդանդաղի  մինչեւ 1,9%, սակայն արդեն 2014թ. կաճի 2,8%-ով, իսկ 2015թ.` 3%-ով:

Ընդ որում, Եվրագոտու ՀՆԱ-ն ընթացիկ տարում կնվազի 0,1%-ով` չնայած արդեն  2014թ. տնտեսական աճը կկազմի 0,9%, իսկ 2015թ.` մինչեւ 1,4%: