Այսօր մամուլում լուրեր էին շրջանառվում, որ ՔԿՀ պաշտոնյաների եկամուտներն ապահովում են դատապարտյալները: Տեղեկություններ կային այն մասին, որ դատապարտյալների հարազատները ամսական 30 հազար դրամ են «մուծում» բանտապետերին, հակառակ դեպքում իրենց հարազատներին քրեական հեղինակությունների միջոցով կներքաշեն մոլի խաղերի մեջ և կգցեն մեծ «պարտքերի» տակ։ Իսկ թե ինչքանո՞վ է այս տեղեկատվությունը համապատասխանում իրականությանը` Slaq.am-ը զրուցեց ՀՀ արդարադատության նախարարության քրեակատարողական վարչությունների լրատվության եւ հասարակայնության հետ կապերի պատասխանատու Գոռ Ղլեչյանի հետ:

Ով միանգամայն հերքեց տարածված այս տեղեկատվությունը և նշեց, որ միգուցե շարքային աշխատողներին գումար փոխանցվի, սակայն դրանք հայտնաբերելու դեպքում խստիվ պատժում են օրենքի ամբողջ խստությամբ: «Ծառայություն է, ամեն ինչ պատահում է, սակայն որ այդպես սիստեմատիկաբար գին է նշանակված և այդ գումարները փոխանցվում է բանտապետերին` դրանք իրականությանը չի համապասխանում»,-Slaq.am-ի հետ զրույցում ասաց Գոռ Ղլեչյանը: Մեր այն դիտարկմանը, թե դատապարտյալները բողոքում են նաև իրենց սնունդից, պատճառաբանելով, որ այն շատ վատն է` Ղլեչյանն առաջարկեց մի օր այց կատարել ՔԿՀ-ր և փորձել դատապարտյալներին տրվող սնունդից: