Մոտ 100 ֆուռ է հավաքվել  Վրաստանի եւ Ռուսաստանի սահմանի հյուսիսօսական հատվածում, Վերին Լարսի անցակետի մոտ: Պատճառը եղանակային վատ պայմաններն են եւ մերկասառույցը, «ՌԻԱ Նովոստիին» ասել է  Ռուսաստանի ԱԻՆ Հյուսիսային Օսիայի գլխավոր վարչության  մամուլի ծառայության ղեկավար Յուլյա Ստարչենկոն:

Նրա խոսքով` ռուսական կողմից մոտ 93 ֆուռ է կուտակվել, որոնցում գտնվում է 180 մարդ:  Անցակետ են այցելել ՌԴ ԱԻՆ հյուսիսօսական կենտրոնի պետի տեղակալ Ալեքսանդր Բարսուկովը եւ  Հյուսիսային Օսիայի ԳՎ պետ Ալեքսանդր Խորունժին:

Ստարչենկոն տեղեկացրել է, որ նախօրեին, ժամը 14.00 –ին Վենին Լարսով մեծ բեռնատար մեքենաների երթեւեկությունը սահմանափակվել է Խաչի լեռնանցում ուժեղ ձյան պատճառով: Դա էլ հանգեցրել է փոխադրամիջոցների կուտակման:

Նա նշել է, որ այն վարորդները, ովքեր տարվա այս եղանակին հաճախ են անցնում այդ վայրով, պատրաստ են եղել դրան եւ ունեն սննդի եւ ջրի պաշար: «Սակայն հաշվի առնելով, որ առաջիկա օրերին եղանակային պայմանների բարելավում չի սպասվում, ԱԻ նախարարությունը  երկու կետ է բացել, որտեղ վարորդները կարող են տաքանալ եւ տաք սնունդ ստանալ»,-ասել է Ստարչենկոն: Նա նաեւ նշել է, որ Վլադիկավկազի իշխանությունները պատրաստ են անվճար տրանսպորտով ապահովել, որպեսզի վարորդները հասնեն քաղաք եւ ժամանակավորապես տեղավորվեն այնտեղ: