Այսօր ՀՀ գյուղատնտեսության նախարար Սերգո Կարապետյանն ընդունեց Ֆրանսիական զարգացման գործակալության Հարավային Կովկասում իրականացվող ծրագրերի գլխավոր մասնագետ Վաչե Փափազյանին:

ԳՆ մամուլի ծառայությունից հայտնում են, թե, ողջունելով հյուրին, նախարարը համառոտակի անդրադարձավ  Անկախությունից ի վեր Հայաստանի գյուղատնտեսության ոլորտում հաստատված իրավիճակին եւ այն խնդիրներին ու հիմնահարցերին, որոնց լուծման գործում ՀՀ գյուղատնտեսության նախարարությունն ակնկալում է նաեւ Ֆրանսիական զարգացման գործակալության աջակցությունը: Ընդգծվեց հատկապես տնտեսությունների խոշորացման եւ գյուղատնտեսական կոոպերատիվների ստեղծման անհրաժեշտությունը:

Շնորհակալություն հայտնելով ընդունելության համար, պարոն Վաչե Փափազյանն ասաց, որ իրենց կազմակերպությունը համագործակցության առաջին քայլերն է կատարում Հայաստանի մի շարք գերատեսչությունների, մասնավորապես Ֆինանսների եւ Տարածքային կառավարման նախարարությունների հետ: Համագործակցության հաջորդ ոլորտը, ըստ հյուրի,գյուղատնտեսությունն է,  եւ իրենք պատրաստ են ներկայացնել կազմակերպության զեկույցը` գործակցության հնարավորությունների երեք կարեւոր սեկտորներով`

- Ոռոգման համակարգի բարելավում:

- Տարածքների կառավարում եւ զարգացում համայնքների միջոցով:

- Շուկայի ապահովածության որակի եւ նորմերի ուսումնասիրություններ:

«Շնորհակալությամբ ենք ընդունում համագործակցության հրավերը եւ պատրաստ ենք ըստ ամենայնի աջակցել նախապատրաստական բոլոր աշխատանքներին»,- նշեց նախարար Սերգո Կարապետյանն` առաջարկելով հնարավորինս հանգամանորեն ներկայացնել գործակալության դիտարկումները, վերջիններիս կոնկրետ ծրագրային լուծումներ տալու համար: