Հայերի ամանորյա սեղանն առանց ցիտրուսային մրգերի դժվար է պատկերացնել: Ցիտրուսայինների խմբում են մանդարինը, նարինջը, թուրինջը, արդեն մեր շուկայում հայտնված լայմը, նաեւ՝ լայն հանրությանն անհայտ հազվագյուտ մրգերը՝ տանժերինն ու կլեմենտինը: 

Մաքսային ծառայության տվյալով, նախորդ տարի Հայաստան է ներկրվել գրեթե 16,3 հազար տոննա ցիտրուսային միրգ՝ ավելի քան 19,2 մլն դոլար ընդհանուր արժեքով:

Ներկրումը կատարվում է հիմնականում  հինգ երկրներից՝ Հունաստանից, Վրաստանից,  Եգիպտոսից, Պակիստանից եւ ՀԱՀ-ից: Ընդ որում՝ կեսից ավելին (55,4%-ը) ներկրվում է Հունաստանից:  Հարեւան Վրաստանից ներկրվում է ընդհանուր ծավալի 18,0%-ը:

Ելնելով ներկրման ծավալից՝ յուրաքանչյուր հայ տարեկան 6-7 կգ ցիտրուսային միրգ է ուտում:

Ցիտրուսային մրգերի ներկրումը օրացուցային տարում անհավասար է բաշխված: Այսպես, նախորդ տարի ներկրման ծավալի կեսից ավելին IV եռամսյակում էր կատարվել: Թեեւ վիճակագրական տվյալները եռամսյակի կտրվածքով են ներկայացվում, կարելի է վստահ ասել, որ ցիտրուսայինների ներկրման ծավալի առյուծի բաժինը դեկտեմբերին է կատարվում:

Ընթացիկ տարվա հունվար-սեպտեմբերին 1 կգ ցիտրուսային մրգերի մաքսազերծման միջին արժեքը 1,20 դոլար է կազմել՝ նախորդ տարվա համեմատ 9 ցենտ նվազելով: